Իրանը դադարեցնում է ԱՄՆ-ի հետ վերջնական համաձայնագրի շուրջ բանակցությունները

Իրանը դադարեցրել է Միացյալ Նահանգների հետ վերջնական կարգավորման համաձայնագրի շուրջ բանակցությունները՝ պատճառաբանելով ամերիկյան կողմի սպառնալիքներն ու ստանձնած պարտավորությունների խախտումները։ Այս մասին ՏԱՍՍ-ին հայտնել է իրանական բարձրաստիճան աղբյուրը։

«ԱՄՆ նախագահ Դոնալդ Թրամփի կողմից իրանցի ժողովրդի հասցեին հնչեցված ուղղակի սպառնալիքների և Վաշինգտոնի կողմից ստանձնած պարտավորությունների բազմակի խախտումների պատճառով Իրանը դադարեցրել է ԱՄՆ-ի հետ վերջնական համաձայնագրի կնքման շուրջ բանակցությունները»,- նշել է աղբյուրը։

Նրա խոսքով՝ ԱՄՆ-ի կողմից Իրանի դեմ ցանկացած ռազմական ագրեսիա կարժանանա ավելի լայնածավալ և վճռական պատասխանի, քան նախկինում։

Աղբյուրը հայտարարել է, որ ԱՄՆ-ը, շարունակելով խախտել իր պարտավորությունները, հարվածներ է հասցրել Իրանի հարավային կղզիներին։ Ի պատասխան՝ Թեհրանը լայնածավալ հարվածներ է իրականացրել տարածաշրջանում ամերիկյան դիրքերի ուղղությամբ՝ դա գնահատելով որպես Իսլամաբադի փոխըմբռնման հուշագրի կոպիտ խախտման պատասխան։

«Իրանը խիստ նախազգուշացրել է, որ ԱՄՆ-ի ցանկացած հետագա ռազմական գործողություն կհանդիպի ավելի վճռական, լայնածավալ և կոշտ հակազդեցության»,- ասել է նա։

Իրանական աղբյուրը նաև պնդել է, որ Միացյալ Նահանգները խախտել է Հորմուզի նեղուցի վերաբերյալ ձեռք բերված պայմանավորվածությունները՝ ընդգծելով, որ նեղուցի նկատմամբ վերահսկողությունն իրականացվելու է Իրանի սահմանած արձանագրությունների համաձայն։