Ռուսաստանում արգելել են դիզելային վառելիքի արտահանումը

Ռուսաստանի իշխանությունները հուլիսի 8-ից արգելել են դիզելային վառելիքի արտահանումը։ Այս մասին կառավարության նիստում, որը նախագահել է ՌԴ նախագահ Վլադիմիր Պուտինը, հայտարարել է փոխվարչապետ Ալեքսանդր Նովակը։

Նովակի խոսքով՝ Ռուսաստանը հուլիսից նաև սկսել է վառելիքի ներմուծում այլ երկրներից։

«Բենզալցակայաններում ստեղծված ներկայիս իրավիճակը մարդկանց մոտ մտահոգություն է առաջացնում։ Իրավիճակը կայունացնելու և առկա խնդիրները լուծելու համար կառավարությունը շարունակում է լրացուցիչ քայլեր ձեռնարկել»,- ասել է նա։

Դիզելային վառելիքի արտահանումն արգելելու ծրագրերի մասին դեռ մայիսի վերջին հայտնել էին «Ինտերֆաքս»-ի և РБК-ի աղբյուրները։ Այդ ժամանակ «Ինտերֆաքս»-ի զրուցակիցներից մեկը նշել էր, որ նման քայլը քիչ հավանական է, քանի որ շուկայում դիզելային վառելիքի պակաս չկա։

Ռուսաստանում վառելիքային ճգնաժամը սկսվել է մայիսի վերջից՝ Ուկրաինայի կողմից ռուսական նավթավերամշակման գործարաններին հասցվող ինտենսիվ հարվածների ֆոնին։ Հարձակման են ենթարկվել երկրի բոլոր խոշոր նավթավերամշակման գործարանները։

ՌԴ նախագահ Վլադիմիր Պուտինը հայտարարել է նաև, որ քաղաքացիներին վառելիքով ապահովելու գործում փոքր և միջին բիզնեսի ներգրավումը պահանջված և կարևոր ուղղություն է։

Այս մասին նա ասել է կառավարության անդամների հետ անցկացրած խորհրդակցության ընթացքում։

«Այս ոլորտում փոքր և միջին բիզնեսի ներգրավումը նույնպես պահանջված է և խրախուսվում է։ Այս ուղղությամբ կշարունակենք աշխատել ավելի ինտենսիվ», - նշել է Պուտինը։

Հայտարարությունն արվել է այն ֆոնին, երբ Ռուսաստանում վառելիքի շուկայում առաջացած խնդիրների պատճառով կառավարությունը հուլիսի 8-ից արգելել է դիզելային վառելիքի արտահանումը և սկսել վառելիքի ներմուծում այլ երկրներից։