Զենք արտադրող ընկերությունը հաստոցների համար մաքսատուրք չի վճարի. Նախագիծ
«Արսենալ ԼՏԴ» ընկերության կողմից ներմուծվող հաստոցներն ու դրանց բաղադրիչ մասերը, հումքը ներմուծման ժամանակ մաքսատուրքից ազատելու հարցը կքննարկվի Կառավարության առաջիկա նիստի ընթացքում: Որպես հիմնավորում նշվում է այն հանգամանքը, որ ընկերությունը դրանով ներդրում է անում գերակա համարվող ոլորտում։
«… Ընկերության կողմից ներմուծվող ապրանքներն օգտագործվելու են զենքի և զինամթերքի արտադրության մեջ»,- ասվում է հիմնավորման մեջ։
Ներմուծվող ապրանքների ցանկում կա 11 անուն ապրանքատեսակ, որոնց ընդհանուր գինը կազմում է մոտ 414 միլիոն դրամ։ Նշվում է, որ այդ ապրանքները ԵԱՏՄ երկրներից չեն ներմուծվում, քանի որ ընկերության չափանիշներին համապատասխանող նույնպիսի սարքավորումներ Միությունում չկան։
Ավելացնենք, որ այս ընկերությունը զենքի արտադրության առաջին արտոնագիրը 3 տարով ստացել է 2017 թվականի նոյեմբերին։ Արտոնագիրը տրվել է խոցման միջոցների, ռազմամթերքի, փամփուշտների արտադրության համար։
