Ասադն Էրդողանին «Ամերիկայի ծառա» է անվանել
Սիրիայի նախագահ Բաշար Ասադը հայտարարել է, որ սիրիական ընդդիմության սահմանադրական հանձնաժողովի երկրորդ մասը չի ներկայացնում Սիրիայի ժողովրդին, այն ներկայացնում է Թուրքիայի տեսակետը:
Հիշեցնենք, որ Սիրիայի սահմանադրական հանձնաժողով ստեղծելու մասին որոշումն ընդունվել է 2018 թվականի հունվարին Սոչիում կայացած Սիրիայի ազգային երկխոսության համագումարի ընթացքում:
Ասադի խոսքերով, հանձնաժողովում Սիրիայի կառավարության ներկայացուցիչները ներկայացնում են սիրիական պետության եւ Սիրիայի ժողովրդի տեսակետը:
«Կա մեկ այլ կողմ, որը, տրամաբանական է, պետք է ներկայացնի սիրիացիների երկրորդ կողմը, որը չի համաընկնում պետության տեսակետի հետ: Սակայն, ինչպես հայտնի է, այդ կողմը ներկայացնում է թուրքական պետությունը, նրանք չեն ներկայացնում ո՛չ սիրիական կողմը, ո՛չ իրենք իրենց: Հարց է առաջանում. մենք այս հանձնաժողովի հետ սիրիական թե թուրքական սահմանադրությունն ենք քննարկում», - ասել է Ասադը` ելույթ ունենալով ՏԻՄ ղեկավարների առաջ: Ելույթը հեռարձակվել է Սիրիայի հեռուստատեսությամբ:
Նա նշել է, որ 2012 թ. Ժնեւում մեկնարկած Սիրիայի քաղաքական գործընթացը հաջողություն չի գրանցել արաբական պետության թշնամի երկրների քաղաքականության պատճառով: «Մեր թշնամի երկրները համառորեն խոչընդոտում են կարգավորման ցանկացած գործընթաց, նույնիսկ եթե դա լուրջ է, օրինակ, Սոչիում եւ Աստանայում ընթացող գործընթացները, որն առնվազն դրական ու հաջողված էր», - ասել է Ասադը:
Ասադն իր խոսքում Թուրքիայի ղեկավար Էրդողանին «Ամերիկայի խղճուկ ծառա» է անվանել:
