Վրաստանում կտուգանեն սեռական ոտնձգությունների համար

Վրաստանում սեռական բնույթի ոտնձգությունները կդիտարկվեն որպես պատժելի արարք։ Այս մասին գրում է apsny. ge կայքը և հավելում, որ նոր կարգը կգործի այն բանից հետո, երբ Վրաստանի վարչական իրավախախտումների մասին օրենսդրությունում փոփոխություններ կմտցվեն։ Գենդերային հավասարության հարցերով խորհրդարանական խորհուրդն ավարտել է համապատասխան օրինագծի պատրաստումը: Համաձայն փաստաթղթի՝ սեռական բնույթի հանցանք են համարվում ֆիզիկական գործողությունները, արտահայտությունները, ինչպես նաև սեռական օրգանների ցուցադրումը: Ըստ այդմ՝ իրավախախտը կտուգանվի 300 լարիով (մոտ 110 դոլար): Մինչդեռ նման վարքի կրկնության դեպքում նա կտուգանվի 500 լարիով, կամ մինչև մեկ ամիս ժամկետով ուղղիչ աշխատանքներ կնշանակվեն: Հատկանշական է, որ անչափահասների, հղիների, մտավոր թերություններով, սահմանափակ կարողություններով անձանց նկատմամբ կամ անչափահասների ներկայությամբ կատարված սեռական ոտնձգությունները տուգանվելու են 500-800 լարիով: Արարքի կրկնության դեպքում տուգանքի չափը կկազմի 800-1000 լարի, կարող է նաև 10-օրյա ժամկետով վարչական կալանք նշանակվել: