Ուսանողի բաց նամակը Նիկոլ Փաշինյանին
Ուսանող, ակտիվիստ Գեղամ Ադյանը ֆեյսբուքյան իր էջում գրել է․ «Բաց նամակ ՀՀ վարչապետ Նիկոլ Փաշինյանին. Պարոն Փաշինյան, հեղափոխության ընթացքում և այսօր էլ, Դուք շարունակում եք կրկնել, որ իշխանությունը ժողովրդի ծառան է, որովհետև իշխանությունն այլևս պատկանում է ժողովրդին։ Ես հավատացած եմ, որ այս խոսքերը Ձեր շուրթերից հնչում են անկեղծորեն, բայց Ամուլսարի հարցում կառավարությունը կարծես խուլ լինի, և Ձեր բացակայության ընթացքում ՏԿԶ նախարարությունը փորձ է անում ճնշել Ջերմուկի ավագանուն, որպեսզի այն չեղարկի նախկինում կայացված որոշումը, ըստ որի՝ Ջերմուկի տարածքում արգելվում է մետաղական հանքարդյունաբերությունը։
Դուք քաջատեղյակ եք, թե ինչ է ժողովուրդը մտածում տվյալ հանքի շահագործման վերաբերյալ և թե ինչ մեծ բողոքի ալիք կառաջանա, եթե այնուամենայնիվ հանքը շահագործվի։ Կոչ եմ անում թեկուզ երկրից դուրս գտնվելով՝ կարգի հրավիրել Տարածքային կառավարման և զարգացման նախարարությանը, որը դեմ է գնում Ջերմուկի բնակչության կողմից ընտրված ԻՆՔՆԱԿԱՌԱՎԱՐՎՈՂ մարմնին՝ ավագանուն»։
