Փաշինյանը բացասական եզրակացություն է տվել Մհեր Ենոքյանին ներում շնորհելու խնդրագրին

ՀՀ վարչապետ Նիկոլ Փաշինյանը բացասական եզրակացություն է տվել սպանության համար ցմահ դատապարտված Մհեր Ենոքյանին ներում շնորհելու խնդրանքին։ Այս մասին հայտնում է Аysor am-ըՙ հղում տալով իր աղբյուրներին: «Եզրակացությունը բացասական է», - ասել է լրատվականի զրուցակիցը։ Ավելի վաղ Aysor.am-ի հարցմանն ի պատասխան կառավարությունից ասել էին, որ 1996-ի հուլիսին բժշկական համալսարանի 19-ամյա ուսանող Իոսիֆ Աղաջանովի սպանության համար ցմահ դատապարտված Մհեր Ենոքյանի ներման խնդրագրի վերաբերյալ վարչապետ Նիկոլ Փաշինյանն իր դիրքորոշումը ներկայացրել է Հայաստանի նախագահին: Հանրապետության նախագահի աշխատակազմը այսօր ստացել էր մի շարք անձանց ներման խնդրագրերի վերաբերյալ վարչապետի առաջարկությունը և առանց առարկությունների ստորագրել համապատասխան հրամանագիրը: Ենոքյանի և Աղաջանովի հարազատների կողմից այս տեղեկության հաստատում կամ հերքում այս պահին դեռ չկա։