ՔԿՀ-ներում սրտի տագնապը բուժում են սանտավիկով, երիկամային անբավարարությունը՝ վալերիանկայով․ Նաիրա Զոհրաբյան
Ազգային ժողովի մարդու իրավունքների պաշտպանության մշտական հանձնաժողովում արդարադատության նախարարի եւ ՄԻՊ-ի մասնակցությամբ քննարկելու են քրեակատարողական հիմնարկների աղետալի վիճակը: Այս մասին «Հայկական ժամանակ»-ի հետ զրույցում տեղեկացրել է հանձնաժողովի նախագահ Նաիրա Զոհրաբյանը:
Զոհրաբյանի խոսքով՝ քննարկվելու է այն հարցը, թե ինչու բժիշկները չեն ցանկանում գնալ եւ աշխատել քրեակատարողական հիմնարկներում: «Պատճառն այն է, որ նրանք ստանում են 60-80 հազար դրամ աշխատավարձ»,- ասաց Նաիրա Զոհրաբյանը:
Հանձնաժողովի նախագահն աղետալի է համարում նաեւ ՔԿՀ-ներում առկա դեղորայքի ցանկը: «Ես բացել եմ քրեակատարողական հիմնարկների դարակները եւ տեսել եմ, թե ինչ դեղեր են: Սրտի տագնապը բուժում են սանտավիկով կամ երիկամային անբավարարվածությունն՝ անալգինով եւ վալերիանկայով: Մենք համալիր խնդիրներ ենք արձանագրել, որոնք հրատապ լուծումներ են պահանջում: Այդ բուժհաստատությունները պետք է հանվեն ՔԿՎ-ի ենթակայությունից: Դեղերի ցանկը պարտադիր պետք է ավելացվի, սանտավիկով հնարավոր չէ սրտի կաթված բուժել»:
Նաիրա Զոհրաբյանը մեր զրույցում տեղեկացրեց, որ քրեակատարողական որոշ հիմնարկներում բժիշկներ չկան: «Մտել եմ քրեակատարողական հիմնարկներ, որտեղ բժշկի պարտականություն կատարել է մեկ այլ կալանավոր: Նա է վիրակապել մեկ այլ կալանավորի, որովհետեւ չկա բժիշկ: Չես կարող բժշկին պարտադրել՝ գնալ քրեակատարողական հիմնարկ, որտեղ մեկ օրվա մնալը հավասարազոր է երեք օրվա խլված կյանքի»:
