![Ծեծել են բուքմեյքերական կենտրոնի գանձապահին և խոշոր չափի գումար հափշտակել](https://auroranews.am/storage/img/base_image/old/6846d5348aa1b68b38a3842e18b3ae12.webp)
Ծեծել են բուքմեյքերական կենտրոնի գանձապահին և խոշոր չափի գումար հափշտակել
![Ծեծել են բուքմեյքերական կենտրոնի գանձապահին և խոշոր չափի գումար հափշտակել](https://auroranews.am/storage/img/base_image/old/6846d5348aa1b68b38a3842e18b3ae12.webp)
Հունվարի 27-ին ավազակային հարձակում է տեղի ունեցել Երևանում։
Ինչպես հայտնում է shamshyan com-ը, ժամը 02։50-ի սահմաններում Ոստիկանության Կենտրոնական բաժին ահազանգ է ստացվել, որ Երևանի Կենտրոն վարչական շրջանում գործող բուքմեյքերական կենտրոնի նկուղային հարկ է մեկնել Երևանի 1-03 շտապօգնության բժիշկների հերթապահ խումբը, ովքեր նշված վայրից ծայրահեղ ծանր ախտորոշմամբ թիվ 1 համալսարանական հիվանդանոց են տեղափոխել մի կնոջ։
Ոստիկանները պարզել են, որ հիվանդանոց տեղափոխվածը նշված բուքմեյքերական կենտրոնի գանձապահ, Արաբկիր վարչական շրջանի բնակիչ, 55-ամյա Հասմիկ Ճ.-ն է, ով մարմնական վնասվածքներ է ստացել մարմնի տարբեր մասերում և գլխի հատվածում։
Ոստիկաններն ու քննիչները պարզել են, որ նույն օրը՝ ժամը 01։50-ի սահմաններում, անհայտ անձը դիմակավորված ներս է մտել նշված կենտրոն, հարձակվել գանձապահի վրա, դաժան ծեծի ենթարկել, որից հետո դրամարկղից գողացել է 1 մլն 85 հազար դրամ և դիմել փախուստի։
Հիվանդանոցում բժիշկները ոստիկաններին և քննիչներին հայտնել են, որ վիրավորը գտնվում է ծայրահեղ ծանր վիճակում և ի վիճակի չէ կատարվածի մասին հաղորդում տալ: