Բողոքի ակցիա կենդանաբանական այգու դիմաց. պահանջը տնօրենի հրաժարականն է
Երևանի Կենդանաբանական այգու տնօրեն Ռուբեն Խաչատրյանի աշխատանքից դժգոհ մի խումբ մարդիկ այսօր առավոտից իրենց դժգոհություններն են հայտնում բողոքի ակցիայի տեսքով: SHANTNEWS-ի թղթակիցը հայտնում է, որ այս պահին Կենդանաբանական այգու մոտ հավաքվել է շուրջ 20 ցուցարար, որոնք հիմնականում կենդանասերներ են և այգու նախկին աշխատակիցներ:
Ցուցարարների պահանջը չի փոխվել, նրանք պաստառներ են պահում, որոնց վրա գրված է տնօրենի անունը: Ցուցարարները վանկարկում են «Ռուբե՛ն, հեռացի՛ր»:
Ցուցարարներն ասում են, որ Ռուբեն Խաչատրյանը չի ցանկանում կենդանասերներին ներառել այգու կառավարման գործընթացում, և հենց դա է պատճառը, որ այգում տեղի են ունենում կենդանիների անկման դեպքեր:
Ակտիվիստները կարծում են, որ Ռուբեն Խաչատրյանը կամայական որոշումներ է կայացնում՝ անտեսելով կենդանիներից հասկացող մարդկանց խորհուրդները:
Բողոքի ակցիայի մասնակիցները պահանջում են կասեցնել տնօրենի լիազորությունները, հայտարարել մրցույթ, կազմել խորհուրդ, որում կլինեն Երևանի քաղաքապետարանի և գյուղատնտեսության նախարարության ներկայացուցիչները, որոնք էլ կընտրեն նոր տնօրենին:
Կենդանաբանական այգու աշխատակիցների կազմակերպած բողոքի ակցիան ավարտվեց: Նրանք նշեցին` քանի որ Կենդանաբանական այգու տնօրեն Ռուբեն Խաչատրյանը տեղում չէ, իսկ իրենք էլ չեն պատրաստվում ցանկապատներ կոտրել, վնաս պատճառել, այսօր ակցիան դադարեցնում են:
Թե ինչպես են պայքարը շարունակելու, իրենց հետագա քայլերի մասին նրանք չհայտնեցին:
