Բագրատաշենի մաքսակետը երկկողմանի փակ է. ապրանք ներկրողներն օրենքի փոփոխություն են պահանջում
Բագրատաշենի մաքսակետի ելքումուտքը Թուրքիայից Հայաստան ապրանք ներկրողների կողմից փակվել է։ Այս մասին Tert-ի հետ զրույցում ասաց Տավուշի մարզի Այրում համայնքի ղեկավար Արայիկ Պարանյանը, ով այս պահին գտնվում է ակցիայի վայրում։
«Խայտառակ վիճակ է, խցանումներ են, տրանսպորտը կաթվածահար վիճակում է։ Երթևեկությունը երկկողմանի փակ է»,- ասաց նա՝ հավելելով, որ բողոքի ակցիայի մասնակիցներն օրենքի փոփոխություն են պահանջում։
Պարանյանի խոսքով՝ ակցիայի մասնակիցները 50-60 տրանսպորտային միջոց են կայանել ու փակել ճանապարհը։
«Ոստկանությունն է այստեղ, բայց չի կարողանում բացել ճանապարհը, քիչ առաջ էլ կռիվ, քաշքշուք էր։ Առայժմ կոնկրետ բան չկա, չգիտեմ՝ ինչ կլինի»,- ընդգծեց Արայիկ Պարանյանը։
Այրում համայնքի ղեկավարը հավելեց, որ բողոքի ակցիայի մասնակիցների պահանջը չի փոխվել՝ նրանք փակել էին Բագրատաշենի մաքսակետի մուտքն ու ելքը՝ ի նշան բողոքի, որ 2019 թվականի հունվարի 1-ից ուժի մեջ է մտել օրենքի նախագիծ, որի հետևանքով առանց մաքսատուրքերի ու հարկերի վճարման չեն կարողանում 25 կգ-ից ավել ապրանք ներմուծել:
Հիշեցնենք, որ այս ճանապարհն առաջին անգամ չէ նույն պահանջով փակվում։
Նշենք, որ ՀՀ սահմանային անցակետերում ֆիզիկական անձանց իրազեկող գրություն է հայտնվել առ այն, որ 2019-ի հունվարի 1-ից ֆիզիկական անձինք կարող են իրենց հետ ունենալ մինչև 25 կգ քաշով անձնական օգտագործման ուղեբեռ, որի արժեքը չի գերազանցում 500 եվրոն։
2019 թվականի հունվարի 1-ից առանց մաքսատուրքերի ու հարկերի վճարման ներմուծվող ապրանքների արժեքային չափը կրճատվելու է 3 անգամ, իսկ կշիռը՝ 2 անգամ: Փոփոխությունները նախատեսված են Եվրասիական տնտեսական հանձնաժողովի խորհրդի` 2017թ. դեկտեմբերի 20-ի «Անձնական օգտագործման ապրանքների հետ կապված առանձին հարցերի վերաբերյալ» թիվ 107 որոշման մեջ ԵՏՀ 2018թ. նոյեմբերի 1-ի թիվ 91 որոշմամբ:
