Համաշխարհային վարկանշային աղյուսակներում տեղ գտած հարուստ և հայտնի հայերը
Ամենահարուստ ու հայտնի հայերը 2018-ի ընթացքում ընդգրկվել են համաշխարհային վարկանշային աղյուսակներում: Այս մասին գրում է Rusarminfo-ն՝ ներկայացնելով նրանցից մի քանիսին:
Forbes բիզնես ամսագիրը հունվարին հրապարակել էր «Ռուսական անշարժ գույքի արքաներ 2018» վարկանիշը, որում ընդգրկվել են ռուսաստանաբնակ գործարարներ Սամվել Կարապետյանը, Ռուբեն Վարդանյանը և Գագիկ Ադիբեկյանը:
«Տաշիր» ընկերությունների խմբի սեփականատեր Սամվել Կարապետյանն ընդգրկվել է նաև ՌԴ նախագահ Վլադիմիր Պուտինի մտերիմ մարդկանց ցանկում, որը հրապարակել էր ԱՄՆ ֆինանսների նախարարությունը «Կրեմլի զեկույցում»:
Նույն ցանկում տեղ էր գտել նաև Ռուսաստանի «Մագնիտ» խոշորագույն մանրածախ ցանցի հիմնադիր, միլիարդատեր Սերգեյ Գալիցկին (իրական ազգանունը՝ Հարությունյան):
Բացի դրանից, Forbes-ի «Ռուսաստանի 200 ամենահարուստ գործարարներ 2018» ցանկում ընդգրկվել էր միանգամից 8 հայազգի գործարար՝ Սամվել Կարապետյանը, Սերգեյ Գալիցկին, Ռուբեն Վարդանյանը, Դավիթ Յանը, Նիկոլայ և Սերգեյ Սարկիսով եղբայրները, Ալբերտ Ավդոլյանը և Անդրեյ Անդրեևը (Անդրեյ Օհանջանյանց):
Forbes-ի «Միլիարդատերեր 2018» համաշխարհային վարկանիշում տեղ են գտել Սամվել Կարապետյանը, Սերգեյ Գալիցկին և արգենտինահայ գործարար Էդուարդո Էռնեկյանը:
2018-ին ամերիկացի գործարար, Reddit կայքի հիմնադիր Ալեքսիս Օհանյանը հանրությանն է ներկայացրել իր նոր Initialized.com նախագիծը՝ հայկական դրոշի գույներով: Անցյալ տարի նա ներկայացրել է նաև իր ստեղծած կոնյակը՝ «Շախմատ» ապրանքնաիշի ներքո:
Հայտնի և հարուստ հայուհիների շարքում իր դիրքը շարունակում է պահպանել ամերիկյան հեռուստատեսության աստղ Քիմ Քարդաշյանը:
