Ղազախստանի ՆԳՆ-ն Նարեկ Գուրուրյանին հորդորել է ինքնակամ հանձնվել
Ղազախստանի Ներքին գործերի նախարարությունը անդրադարձել է Կարգանդայում տեղի ունեցած միջադեպից հետո հետախուզման մեջ գտնվող հայ երիտասարդի հայտարարությունը։
Հայտարարության մեջ մասնավորապես ասվում է․
«Դեռ 2 օր առաջ նրա հարազատներին է փոխանցվել մեր գործընկերների բոլոր կոնտակտները: Սակայն մինչև օրս ոչ ոք կապ չի հաստատել նրանց հետ:
Նախարարությունը երաշխավորում է գործի օբյեկտիվ և համապարփակ քննությունը»:
Ներքին գործերի նախարարությունը հետախուզման մեջ գտնվող Նարեկ Գուրուրյանին կոչ է արել ինքնակամ հանձնվել ոստիկանության աշխատակիցներին՝ ծանրացուցիչ հանգամանքներից խուսափելու համար:
Նշենք, որ Ամանորի գիշերը Կարագանդայում տեղի ունեցած վիճաբանության մասնակիցներից մեկը՝ այժմ համապետական հետախուզման մեջ գտնվող Նարեկ Գուրուրյանը ավելի վաղ տեսաուղերձ էր հղել: Տեսաուղերձում Նարեկ Հովնանի Գուրուրյանը, ներկայանալուց հետո նշել էր․ «Ցանկանում եմ ասել, որ ոչ ոքի չեմ սպանել: Այն չարաբաստիկ գիշերը ես «Հին Հռոմ» ռեստորանում մասնակցել եմ զանգվածային ծեծկռտուքին, սակայն ոչ ոքի չեմ սպանել» Ես պատրաստ եմ պատասխան տալ իմ արարքների համար, սակայն ուրիշի մեղքն ինձ վրա չեմ վերցնի: Ես մարդասպան չեմ»։
Հիշեցնենք, որ Ամանորի գիշերը ոչ սթափ վիճակում գտնվող մի խումբ տղամարդկանց միջև ծեծկռտուք էր տեղի ունեցել Կարագանդա քաղաքի «Հին Հռոմ» ռեստորանի մոտ, որի ժամանակ մեկ մարդ դանակի վնասվածքից մահացել էր, ևս երեքը՝ վիրավորվել:
Միջադեպից հետո երեք մարդ կալանավորվել է 2 ամսով, իսկ Նարեկ Գուրուրյանի նկատմամբ հետախուզում է հայտարարվել:
