Ջավախահայերին կվերադարձվեն նրանց անձնագրերը․ Լրատվամիջոց
Այսօր, հաշված ժամեր անց Հայաստանում կվերադարձնեն այն ջավախահայերի անձնագրերը, որոնք երկքաղաքացի լինելու պատճառով Ռուսաստանից տունդարձի ճանապարհին ՀՀ-ում բռնվել էին,- գրում է Armtimes.com-ը։
Նոյեմբեր ամսից սկսած երկքաղաքացիություն ստացած եւ 27 տարին չլրացած երիտասարդները, հայտնվելով Հայաստանում, կանգնում էին փաստի առաջ՝ ունենալով «ընտրության» երկու տարբերակ՝ կա՛մ զորակոչվել ՀՀ բանակ, կա՛մ 5 տարի ժամկետով ազատազրկվել: Դեկտեմբերի 14-ին նրանք Նինոծմինդա-Բավրա սահմանային անցակետում իրականացրեցին կարճատեւ բողոքի ակցիա:
Ջավախքի բնակիչ Անդրանիկ Ղարսլյանը «Հայկական ժամանակ»-ին հայտնեց, որ հանդիպել են Հայաստանի ոստիկանապետ Վալերի Օսիպյանի հետ, կառուցողական քննարկում ունեցել. «Վալերի Օսիպյանը հարցը ներկայացրել է ՀՀ վարչապետի պաշտոնակատար Նիկոլ Փաշինյանին եւ կարծես թե խնդիրը կարգավորվում է: Սա մեր ակցիայի արդյունքն է»:
