Հայկ Մարությանն արձագանք է հանրության պահանջին. գլխավոր տոնածառն աստղաբաշխական գին չունի

Հանրության մոտ բուռն արձագանք է հենց հիացմունքի պահով, մարդկանց մեծամասնությունը շատ ուրախացել է այս տոնածառով, ես ինքս շատ ուրախացել եմ՝ որպես երևանցի: Այս մասին երեկ լրագրողների հետ ճեպազրույցում նշել է Երևանի քաղաքապետ Հայկ Մարությանը՝ պատասխանելով հարցին, թե արդյոք արդարացված են հանրության բուռն և բացասական արձագանքները, որ կան Երևանի տոնածառի ծախսերի մասով: «Վստահեցնում եմ, որ գինն իրապես թանկ չի դրա համար, հենց հանրության պահանջն էր, որ ունենանք նոր տոնածառ: Ես սոցցանցերում արդեն նկատում եմ ուրախությունը, և այդ ուրախությունն ամբողջ հայությանն է»,-նկատել է քաղաքապետը: Հարցին, թե արժեր այդքան գումար տրամադրել տոնածառի գնման համար, նա արձագանքել է. «Մենք բավականին մեծ գումար ենք տնտեսել Երևանի 2800-ամյակի միջոցառումներից, սա տնտեսած գումարների շատ փոքրիկ մասնիկն էր, և այս ուրախությունը, վստահեցնում եմ, արժեր: Ասեմ եմ, որ այդ գումարը, որ նշվել էր, նաև լուսավորության, խաղալիքների, հավաքելու համար էր, ոչ միայն տոնածառի»: Նա հավելել է, որ տոնածառի համար աստղաբաշխական գներ չեն տրվել: Հիշեցնենք, որ Երևանի քաղաքապետարանը երկրի գլխավոր տոնածառը տեղադրելու վրա ծախսել է 70 միլիոն դրամ։ 35 մետր բարձրությամբ գլխավոր տոնածառի արժեքի մեջ, որը արհեստական է և ռուսական արտադրության, մտնում են դրա տեղափոխումը, մոնտաժը, 1500 խաղալիք և ավելի քան 200 կմ լուսադիոդային լույսեր։