Ռ․Քոչարյան,Ն․Սարգսյան,օֆշորային ընկերություն ու մի շարք այլ հարցեր․Ա․Վանեցյանի պատասխանները՝ համառոտ

ԱԱԾ տնօրեն Արթուր Վանեցյանն այսօր Ծաղկաձորում «Նկատառումներ, շեշտադրումներ, առաջարկություններ լրատվական հանրությանը» թեմայով սեմինարի շրջանակներում հանդիպում է ունեցել լրագրողների հետ, որի ժամանակ պատասխանել է մի շարք հարցերի։ -Ազգային անվտանգության ծառայության տնօրենը համոզված է, որ առաջիկայում կհայտնաբերվեն ու պատասխանատվության կենթարկվեն իր, ՀՀ վարչապետի պաշտոնակատար Նիկոլ Փաշինյանի և ՀՔԾ պետ Սասուն Խաչատրյանի հեռախոսազրույցը գաղտնալսած անձիք: Խոսակցությունները մոնտաժված են, դա կապացուցվի նաև փորձաքննությամբ: Ես երբևէ իմ խոսակցություններում չեմ ասել որևէ բառ, որից կարող եմ ամաչել: Ընդհակառակը, գաղտնալսումները լույս սփռեցին այն ամենի վրա, ինչ կատարվում է: ԱԱԾ տնօրեն Արթուր Վանեցյանն այսօր ArmLur.am-ի հթղթակցի հետ զրույցում հրաժարվել է մեկնաբանել տեսակետը, որ աղմկահարույց գաղտնալսումը հնարավոր է նախկին իշխանությունների ձեռագիրն է: -ԱԱԾ տնօրեն Արթուր Վանեցյանը անդրադարձել է ՀՀ երկրորդ նախագահ Ռոբերտ Քոչարյանի պաշտպանների՝ ՄԻԵԴ դիմելու որոշմանը․ «Ցանկացած պաշտպանական կողմ, փաստաբանների խումբ կամ փաստաբան կարող է դիմել ցանկացած մարմնի, որպեզի ստանա այս կամ այն հարցի պատասխանը կամ որոշում: Ես չեմ ուզում որեւէ գնահատական տալ կամ կարծիք հայտնել: ՄԻԵԴ-ը այն կառուցն է, որ այդ հարցի պատասխանը կտա, ես երեւի թե ամենաշահագրգռված անձանցից եմ, որ պաշտպանները որքան հնարավոր է շուտ դիմեն այդ դատարան եւ ստանան իրենց հուզող հարցերի պատախանը»։ -«Կոնգրես» հյուրանոցը գնվել է ապօրինի ձեռք բերված գումարներով, այդ մասով քրեական գործը հարուցված է փողերի լվացման հատկանիշներով։ Պարոն Սեդրակ Քոչարյանը հրավիրվել է Ազգային անվտանգության ծառայության քննչական դեպարտամենտ, հարցաքննվել է որպես վկա։ Գործով իրականացվել են անհրաժեշտ միջոցառումներ, և առաջիկայում այդ գործով կտրվի հստակ տեղեկատվություն։ Դեռ մեղադրյալ չկա։ Թյուրիմացություն է եղել իմ այն հայտարարությունը, թե «Կոնգրես» հյուրանոցի ձեռբերումը կոռուպցիոն շղթայով է ձեռք բերվել։ -Ալեքսանդր Սարգսյանի նկատմամբ հարուցված քրեական գործը փողերի լվացման հատկանիշներով է և դրանով ընթանում է քննություն։ -Հայաստանի 3-րդ նախագահ Սերժ Սարգսյանի եղբոր՝ Ալեքսանդր Սարգսյանի որդին՝ Նարեկ Սարգսյանը, որին Գվատեմալայի քաղաքացի Ֆրանկլին Գոնսալես անունով անձնագրով դեկտեմբերի 6-ին հայտնաբերել էին Պրահայում, կանգնելու է դատարանի առաջ, քանի որ բոլոր հանգամանքները ի հայտ են եկել, փորձաքննության են ուղարկվել հայտնաբերված գծանկարները, որի արդյունքներով հաստատվել է, որ դրանք Սարյանի վրձնին են պատկանում։ Նարեկ Սարգսյանի էքստրադիցիայի հարցը առաջիկայում կլուծվի։ -ԱԺ նախկին պատգամավոր Շմայս մականունով հայտնի Առաքել Մովսիսյանի վերաբերյալ քննվող քրեական գործն ԱԱԾ-ն կարճել է: Արթուր Վանեցյանի խոսքով, երբ անձը ինքնակամ հանձնում է զենք-զինամթերքը, ապա որոշակի պայմանների առկայության դեպքում քրեական գործը կարճվում է: -Եկեղեցին և պետությունը տարանջատված են, մենք որևէ իրավասություն չունենք խառնվել եկեղեցու գործերի մեջ։ Մենք կարող ենք միայն ապահովել եկեղեցու և եկեղեցական համայնքի անվտանգությունը։ Ցանկացած բռնություն դատապարտելի է։ Համոզված եմ, որ եկեղեցին այնքան ուժ ու իմաստնություն ունի, որ կկարողանա այդ խնդիրը լուծել։ -Գյումրիում դեկտեմբերի 3-ին քաղաքի փողոցները մաքրելու դուրս եկած 57-ամյա կոնջը դաժան ծեծի ենթարկած 102-րդ ռուսական ռազմաբազայի ռուս զինծառայողը պետք է դատապարտվի հայկական դատարանում: Մարդասպանը չունի ազգություն, չունի պատկանելություն, այս կամ այն մասնագիտությանը, մարդասպանը մնում է մարդասպան և պետք է դատապարտվի։ - Արթուր Վանեցյանը` պատասխանելով հարցին, թե արդյոք ԱԱԾ-ն նույն ջանասիրությամբ զբաղվո՞ւմ է նաև Արթուր Վանեցյանի հարազատների բիզնեսներով, նաև Զիմֆիրա Վանեցյանի՝ օֆշորում գրանցված բիզնեսով, ասել է․ «Զեմֆիրա Վանեցյանն իմ հորեղբոր կինն է և 1989 թվականից չի բնակվում Հայաստանում, նա հորեղբորս հետ բնակվում է Ժնևում։ Ես բիզնես չունեմ, խոշոր գործարար է եղբայրս՝ Կարեն Վանեցյանը, ով նույնպես ՀՀ քաղաքացի չէր, ՀՀ քաղաքացիություն ստացել է այս տարի ՀՀ-ում տեղի ունեցած հեղափոխությունից հետո։ Նա ևս բիզնես գործունեություն չի ծավալում ՀՀ-ում, ՀՀ-ում չէ 1989 թվականից։ Կարեն և Արմեն Վանեցյանները խոշոր գործարարներ են, բիզնես գործունեություն են ծավալում Ուկրաինայում, Իրաքում, Իրանում, Սերբիայում և հետաքննող լրագրողները կարող են հետաքննել նրանց գործունեությունը։ Օֆշորային ընկերությունը հանցագործություն չէ։ Դա բիզնես գործիք է, որն օգտագործվում է աշխարհի շատ գործարարների կողմից»։ -«Ուժային կառույցներում մշտապես լինում են տեղաշարժեր։ Արցախի հանրապետության Պաշտպանության նախարարի արդեն նախկին հրամանատար Լևոն Մնացականյանի այլ աշխատանքի անցնելը շատ բնական եմ համարում։ Որևէ արտառոց բան չեմ տեսնում։ Արցախի և հայկական սահմանները ինչպես պաշտպանվել են, այնպես էլ պաշտպանվել են»։ Լրագրողների դիտարկմանը,թե դա կապ չունե՞ր Սասուն Միքայելյանի հայտարարության և Լևոն Մնացականյանի պատասխանի հետ,Արթուր Վանեցյանն ասել է այդպես չի կարծում։