Կամ ծառայություն, կամ ազատազրկում. Վալերի Օսիպյանը հանդիպել է ջավախքցի երիտասարդներին

Հայ–վրացական սահմանին՝ Նինոծմինդա–Բավրա անցակետում երեկ բողոքի ակցիա անցկացնող ջավախքցի երիտասարդներն այսօր հանդիպել են ՀՀ ոստիկանապետ Վալերի Օսիպյանի հետ։ Այս մասին NEWS.am-ի թղթակցի հետ զրույցում ասել է բողոքի ակցիայի մասնակիցներից մեկը։ ՙՊարոն Օսիպյանը լսել է մեր բողոքը, ասել է, որ իրենք հետամուտ կլինի հարցի լուծմանը եւ աել են, որ երկուշաբթի մեզ պատասխան կտան։ Մենք կսպասենք մինչեւ երկուշաբթի, եթե պատասխան չլինի, մենք այդ ժամանակ կառավարությանը կդիմենք։ Առայժմ մենք կառավարությունում ոչ մեկի հետ չենք հանդիպի՚,–ասել է զրուցակիցը ու հավելել է, որ իրենք առայժմ դադարեցնում են բողոքի ակցիաները եւ սպասում են Ոստիկանության պատասխանին։ Դրանից հետո եթե պատասխանն իրենց չբավարարի իրենք կդիմեն Կառավարություն եւ կվերսկսեն բողոքի ակցիաները։ Հիշեցնենք, որ նրանք պնդում են՝ դժվար կացության մեջ են հայտնվում Ռուսաստանից տուն վերադառնալիս։ Մինչեւ 27 տարեկան այն երիտասարդները, որոնք երկքաղաքացի են եւ ունեն հայկական անձնագիր, Ռուսաստանից վերադառնալիս Հայաստան մուտք գործելիս փաստի առաջ են կանգնում՝ կամ պետք է զորակոչվեն հայկական բանակ, կամ 5 տարի ժամկետով ազատազրկվեն։ Tert.am-ի թղթակցի հետ զրույցում էլ Նինոծմինդայի և Ախալքալաքի մեծամասնական պատգամավոր Հենզել Մկոյանն ասել է, որ արդեն 10 երիտասարդի ձերբակալել են: ՀՀ-ի սահման մտնելու ժամանակ նրանց ձերբակալել են և պահանջում են, որ գնան բանակ ծառայության, հակառակ դեպքում՝ նրանց սպասվում է 5 տարի ժամկետով ազատազրկում: