11 ամիսների ընթացքում՝ 3 մլն հակերային հարձակման փորձ. ԱԱԾ
ՙԱյս տարվա 11 ամիսների ընթացքում ՀՀ պետական կառույցների պաշտոնական կայքէջերի վրա 3 մլն հակերային հարձակման փորձ է արվել, իսկ դրանք փորձեր են համարվում, որովհետև նպատակին չեն ծառայել: Հակերային հարձակման փորձերն արվել են ոչ միայն Ադրբեջանից, այլ նաև եվրոպական երկրների կողմից՚,-այս մասին այսօր ասել է ԱԱԾ գիտա-ուսումնական կենտրոնի պետ, գնդապետ Արմեն Քինակցյանը։
Tert.am-ի թղթակցի հարցին, թե ինչ նպատակ են հետապնդել դրանք, և որ երկրներից են արվել փորձերը, Քինակցյանն ասել է, որ նույն Ադրբեջանը կարող է հակերային խումբ վարձել մեկ այլ երկրում, հետևաբար էական չէ, թե որ երկրից են տեղի ունենում հարձակումները։
Նա նշեց, որ խոսքը միայն պետական կառույցների կայքերի մասին է, որովհետև դրանք են գտնվում ԱԱԾ-ի տիրույթում։ Քինակցյանն ասել է, որ եղել են դեպքեր, որ դանդաղել է կայքերի աշխատանքը և այլն, սակայն այդ հարձակումները նպատակին չեն հասել։
