Երևանի 192 դպրոցի տնօրենը աշխատանքի ընդունման դիմաց կաշառք է ստացել և վատնել իրեն վստահված միջոցները։ Դեպքի առթիվ քրեական գործ է հարուցվել, որը Քննչական կոմիտեում վարույթ է ընդունվել։ Այս մասին Aurora News-ը տեղեկանում է կոմիտեի տարածած հաղորդագրությունից։ Պարզվել է, որ Երևանի Գ.Վարդանյանի անվան թիվ 192 հիմնական դպրոց ՀՈԱԿ-ի տնօրենը, նախնական համաձայնության գալով Երևան քաղաքի՝ 1965 թվականին ծնված բնակչուհու հետ, վերջինիս աղջկան նույն դպրոցում որպես դասվար հրամանագրելու համար 2013 թվականի օգոստոսին պահանջել և ստացել է 1500 ԱՄՆ դոլար կաշառք: Բացի դա, նույն դպրոցի տնօրենը 2013 թ․-ի ապրիլից մինչև 2018 թ․-ի մայիսն ընկած ժամանակահատվածում դպրոցի լաբորանտի և հոգեբանի հաստիքներում աշխատանքի է ընդունել Ա. Գ.-ին, ով փաստացի աշխատանքի չի հաճախել, իսկ վերջինիս անվամբ դուրս է գրվել 1.161.679 դրամ աշխատավարձ: Այսպիսով՝ տնօրենի կողմից առերևույթ վատնվել է իրեն վստահված 1.161.679 դրամ գումարը: