Քրեական գործ` Telegram-ի հիմնադիր Պավել Դուրովի դեմ . ՌԴ-ն հայտարարել է միջազգային հետախուզում

Ռուսաստանի Դաշնության Ազգային անվտանգության ծառայությունը հայտնել է Telegram-ի հիմնադիր Պավել Դուրովին ահաբեկչական գործունեությանն օժանդակելու մեղադրանք ներկայացնելու մասին, քանի որ հավելվածի ղեկավարությունը չի հեռացնում Ռուսաստանում դիվերսիոն և ահաբեկչական գործողությունների համակարգման համար կիրառվող ալիքներն ու բոտերը։

ԱԱԾ Հասարակայնության հետ կապերի կենտրոնից չորեքշաբթի տեղեկացրել են, որ Telegram-ի ղեկավար Պ. Դուրովի նկատմամբ հարուցված քրեական գործի շրջանակում մեղադրանք է առաջադրվել ՌԴ Քրեական օրենսգրքի 205.1 հոդվածի 1.1 մասով (ահաբեկչական գործունեությանն աջակցելը), և նրա նկատմամբ հայտարարվել է միջազգային հետախուզում։

Հատուկ ծառայության փոխանցմամբ՝ հավելվածը չի ջնջում բազմաթիվ ալիքներ, չաթեր և բոտեր, որոնք ակտիվորեն օգտագործվում են ուկրաինական հատուկ ծառայությունների, ահաբեկչական ու ծայրահեղական խմբավորումների կողմից ՌԴ-ում դիվերսիոն-ահաբեկչական գործողություններ, զանգվածային սպանություններ և կիբեռխարդախություններ կազմակերպելու ու համակարգելու համար, ինչը հանգեցրել է մարդկային բազմաթիվ զոհերի, այդ թվում՝ կանանց ու երեխաների, ինչպես նաև հսկայական նյութական վնասների։

Փետրվարի 10-ին Ռոսկոմնադզորի մամուլի ծառայությունից հայտնել էին, որ Telegram-ը, որի գործունեությունը Ռուսաստանում սկսել էին սահմանափակել նախորդ տարվա օգոստոսին, շարունակում է չկատարել ՌԴ օրենսդրության պահանջները, ինչի պատճառով հարթակի աշխատանքի սահմանափակումները կպահպանվեն՝ քաղաքացիների պաշտպանությունն ապահովելու և օրենքի կատարումն ապահովելու համար։

Իրավապահ մարմիններից «Ինտերֆաքս»-ին հայտնել են, որ միայն ընթացիկ տարվա սկզբից Telegram-ը Ռուսաստանում տուգանվել է ընդհանուր առմամբ ավելի քան 100 միլիոն ռուբլիով՝ հիմնականում ՌԴ-ում արգելված բովանդակությունը չհեռացնելու պատճառով (ՌԴ Վարչական իրավախախտումների վերաբերյալ օրենսգրքի 13.41 հոդվածի 2-րդ մաս)։

Երկուշաբթի օրը ՌԴ նախագահի մամուլի քարտուղար Դմիտրի Պեսկովը նշել է, որ Telegram-ի աշխատանքի վերականգնման շուրջ շփումներ առկա են, սակայն մեսենջերի ներկայացուցիչները բավարար ակտիվություն չեն ցուցաբերում։