Շարմազանովը հայտարարել է՝ ԵԱՏՄ-ին անդամակցելու Սերժ Սարգսյանի որոշումը չունի իրական այլընտրանք

ՀՀԿ ԳՄ անդամ Էդուարդ Շարմազանովը հայտարարել է, որ ժամանակը, ցույց է տվել՝ Հայաստանի՝ ԵԱՏՄ-ին անդամակցելու որոշումը եղել է արդարացված և այսօր ևս չունի իրական այլընտրանք։

Շարմազանովը ֆեյսբուքյան իր էջում գրել է, որ Հայաստանի արտաքին քաղաքական ընտրությունը պետք է բխի ոչ թե առանձին գաղափարներից, այլ երկրի պետական ու ազգային շահերից։

Նա անդրադարձել է նաև Հայաստանի՝ Եվրամիության հետ հարաբերություններին՝ նշելով, որ ԵՄ-ում Հայաստանի անդամակցության վերաբերյալ որևէ պաշտոնական առաջարկ կամ հստակ խոստում չկա։

«ԵՄ-ում ՀՀ-ի անդամությանը ոչ սպասող կա, ոչ էլ առաջարկող։ ԵՄ-ն նույնիսկ ՀՀ-ին ասոցիատիվ անդամության հեռանկար չի խոստացել»,- գրել է Շարմազանովը։

Նրա խոսքով՝ ՔՊ-ի նախաձեռնությամբ Ազգային ժողովում ԵՄ անդամակցության գործընթաց սկսելու վերաբերյալ օրինագծի ընդունումը եղել է «քարոզչական քայլ»։

Շարմազանովը հիշեցրել է, որ այդ նախաձեռնությանը դեմ է քվեարկել միայն «Պատիվ ունեմ» խմբակցությունը։

Անդրադառնալով ԵԱՏՄ-ին՝ ՀՀԿ ներկայացուցիչը նշել է, որ Սերժ Սարգսյանի նախագահության տարիներին Հայաստանի՝ այդ կառույցին միանալու որոշումը, իր կարծիքով, սպասարկել է Հայաստանի քաղաքացիների շահերը։

Նա քննադատել է գործող իշխանությունների արտաքին քաղաքական քայլերը՝ նշելով, որ դրանք, ըստ նրա, խնդիրներ են առաջացրել գյուղատնտեսության ոլորտում, իսկ արտահանողները բախվում են դժվարությունների։

Շարմազանովը նաև նշել է, որ ԵՄ-ն այս պահին անվտանգային կառույց չէ և չի կարող անվտանգության երաշխիքներ տրամադրել Հայաստանին։

Նրա խոսքով՝ տարածաշրջանում կարևոր անվտանգային դերակատար է ՆԱՏՕ-ի անդամ Թուրքիան, որը, ըստ նրա, Ադրբեջանի դաշնակիցն է և Հայաստանի համար կարող է դիտարկվել որպես պոտենցիալ սպառնալիք։

«Հայաստանը պետք է մնա իր տեղում։ Իսկ այդ տեղը 1991 թվականի սեպտեմբերի 21-ին հայ ժողովուրդը հանրաքվեով որոշել է՝ անկախ Հայաստանի Հանրապետություն»,- գրել է Շարմազանովը՝ ընդգծելով, որ Հայաստանը չպետք է լինի որևէ ուժի «պլացդարմ», «ֆորպոստ» կամ «վիլայեթ»։