Ֆրանսիայում ուժեղ ամպրոպները խլել են երկու մարդու կյանք, հազարավոր տներ մնացել են առանց հոսանքի

Ֆրանսիային պատուհասած հզոր ամպրոպների պատճառով 53 հազար տնային տնտեսություններ մնացել են առանց էլեկտրականության, ինչն ազդել է ավելի քան 100 հազար քաղաքացիների վրա:

Հեռուստաալիք BFM TV-ն, հիմնվելով էլեկտրական ցանցերի բաշխիչ օպերատոր Enedis-ի տվյալների վրա, տեղեկացնում է, որ հուլիսի 17-ի գիշերը պետության տարածքում արձանագրվել է կայծակի ավելի քան 141 հազար հարված։ Աղետից առավելապես տուժել են Նոր Ակվիտանիա և Օվերն-Ռոն-Ալպեր տարածաշրջանները, որտեղ էլեկտրամատակարարումից զրկվել է համապատասխանաբար մոտ 20 հազար և 25 հազար տնային տնտեսություն։ Կատաղի քամու ու անբարենպաստ եղանակային պայմանների պատճառով տարբեր վայրերում տապալվել են ծառեր, ինչը խոչընդոտում է վերականգնողական գործընթացներին։

 BFM TV-ի փոխանցմամբ՝ բնական տարերքի հետևանքով մահացել է երկու մարդ: Նախորդ օրը ֆրանսիական ղեկավարությունը նույնպես հայտարարել էր, որ երկիրը հայտնվել է անսովոր վաղ երաշտի մեջ, ինչի պատճառով տարբեր շրջաններում կիրառվել են ջրի օգտագործման ռեկորդային սահմանափակումներ: