Ադրբեջանի և Թրամփի վարչակազմի հարաբերությունները գերազանց են․ Ալիև

Ադրբեջանի և ԱՄՆ նախագահ Դոնալդ Թրամփի վարչակազմի հարաբերությունները գտնվում են գերազանց մակարդակի վրա և արդեն հասել են ռազմավարական գործընկերության աստիճանի։ Այս մասին Շուշիում անցկացվող 4-րդ Գլոբալ մեդիա ֆորումում հայտարարել է Ադրբեջանի նախագահ Իլհամ Ալիևը։

Նրա խոսքով՝ այդ մասին են վկայում անցած տարվա օգոստոսին Վաշինգտոնում նախագահ Թրամփի հետ կայացած հանդիպումը, այս տարվա հունվարին Դավոսում ունեցած բանակցությունները, ինչպես նաև Ադրբեջանի հրավերը՝ դառնալու Թրամփի նախաձեռնությամբ ստեղծված Խաղաղության խորհրդի հիմնադիր անդամներից մեկը։

Ալիևը նաև նշել է ԱՄՆ փոխնախագահ Ջեյ Դի Վենսի այցը Ադրբեջան և Բաքվում նրա հետ Ռազմավարական գործընկերության հաստատման համատեղ հռչակագրի ստորագրումը՝ ընդգծելով, որ այս ամենը վկայում է երկկողմ հարաբերությունների աննախադեպ զարգացման մասին։

Ադրբեջանի նախագահը հայտնել է, որ ներկայումս ակտիվ աշխատանքներ են տարվում ռազմավարական գործընկերության հռչակագրի բոլոր դրույթների իրականացման ուղղությամբ։ Նրա խոսքով՝ ստեղծված աշխատանքային խմբերը համագործակցում են առևտրի և ներդրումների, թվային փոխակերպման և արհեստական բանականության, էներգետիկ անվտանգության, տրանսպորտային կապերի, ինչպես նաև պաշտպանության և սպառազինության վաճառքի ոլորտներում։

Ալիևը նաև հայտարարել է, որ ԱՄՆ-ն ամբողջությամբ հանել է Ադրբեջանին զենքի վաճառքի բոլոր սահմանափակումները։

«Դրանից անմիջապես հետո նույն քայլին դիմեցին նաև Միացյալ Թագավորությունն ու Եվրամիության անդամ պետությունները։ Կարծում եմ՝ սա հստակ ցույց է տալիս մեր երկկողմ հարաբերությունների ոգին, էությունը և հետագա զարգացման ներուժը»,- ասել է Ադրբեջանի նախագահը։