ԱՄՆ-ում ութ մարդու մեղադրանք է առաջադրվել Սպիտակ տան վրա հարձակման նախապատրաստման համար

Հուլիսի 9-ին ԱՄՆ-ի ութ բնակչի մեղադրանք է առաջադրվել սպանության և 2026 թվականի հունիսի 14-ին՝ Դոնալդ Թրամփի ծննդյան օրը, Սպիտակ տան Հարավային սիզամարգում նախատեսված UFC Freedom 250 մրցաշարի ընթացքում ահաբեկչական գործողություն կազմակերպելու նպատակով դավադրության համար։ Այդ մասին հայտնում է AP News-ը։ Տղամարդկանց ներկայացվել են երկու առանձին մեղադրանքներ՝ ահաբեկիչներին նյութական աջակցություն ցուցաբերելու և դաշնային կառավարության տարածքում պաշտոնատար անձի սպանություն կազմակերպելու նպատակով դավադրության համար։

Հուլիսի 9-ի մեղադրական եզրակացությունը նպատակ ունի համակարգել գործը և բոլոր մեղադրյալներին միավորել մեկ քրեական վարույթի շրջանակում՝ դավադրության գործով։ Պաշտոնական տվյալներով՝ խմբի անդամները հետևել են մարգինալ դավադրապաշտական տեսություններին և հույս են ունեցել, որ հարձակումը կդեստաբիլիզացնի կառավարությունը։ Նախապատրաստական աշխատանքները սկսվել են մայիսին, երբ խումբը սկսել էր կուտակել դրամական միջոցներ, հրազեն, զինամթերք, զրահաբաճկոններ, պայթուցիկ նյութեր, անօդաչու թռչող սարքեր, բժշկական սարքավորումներ, կապի միջոցներ և այլ պարագաներ։

Մեղադրյալներից մեկը քննիչներին հայտնել է, որ ծրագրել էին պայթուցիկներով բեռնված անօդաչու թռչող սարքեր ուղարկել ցուցադրական մենամարտերի անցկացման վայր, ապա կրակ բացել խուճապահար փախչող հանդիսատեսի ուղղությամբ։ Դաշնային դատախազների պնդմամբ՝ խումբը նախատեսել էր սպանել Դոնալդ Թրամփին, փոխնախագահ Ջեյ Դի Վենսին, այլ դաշնային պաշտոնյաների, Իսրայելի վարչապետ Բենիամին Նեթանյահուին, միլիարդատեր Իլոն Մասկին և միջոցառմանը ներկա «այլ բարձրաստիճան անձանց»։

Խմբի յոթ անդամներ ձերբակալվել են հունիսի 11-ից 21-ն ընկած ժամանակահատվածում։ Չկայացած հարձակման կազմակերպիչ է համարվում Մեքսիկայից ներգաղթած Աբրահամ Էրմոսիլիո Ալվարեսը, որը ձերբակալվել է Նեբրասկա նահանգում։ Մյուս կասկածյալները ձերբակալվել են Օհայո, Միսուրի, Կալիֆոռնիա և Վաշինգտոն նահանգներում։ Այս շաբաթ մեղադրյալների շարքին միացել է նաև Արևմտյան Վիրջինիայում ձերբակալված 21-ամյա տեղացի բնակիչը։

ՀԴԲ-ն նախատեսվող ահաբեկչության մասին տեղեկացել էր մրցաշարից չորս օր առաջ՝ դավադիրներից մեկի անհանգստացած մոր շնորհիվ, որը զանգահարել էր ոստիկանություն։