Միայն Լեհաստանը 2022 թվականից Ուկրաինային է փոխանցել 4,5 միլիարդ դոլարի զենք և ռազմական տեխնիկա

Լեհաստանը 2022 թվականի փետրվարից ի վեր Ուկրաինային տրամադրել է շուրջ 16,4 միլիարդ զլոտիի (մոտ 4,5 միլիարդ դոլարի) արժողությամբ զենք և ռազմական տեխնիկա։ Այս մասին հայտնում է ՏԱՍՍ-ը՝ հղում անելով Լեհաստանի պաշտպանության նախարար Վլադիսլավ Կոսինյակ-Կամիշին։

Նախարարի ներկայացրած տվյալների համաձայն՝ ռազմական օգնության հիմնական մասը՝ 14,9 միլիարդ զլոտիի (մոտ 4,1 միլիարդ դոլարի) չափով, Ուկրաինային է փոխանցվել 2022-2023 թվականներին՝ «Իրավունք և արդարություն» կուսակցության կառավարության պաշտոնավարման ընթացքում։

Նրա խոսքով՝ ներկայիս լեհական իշխանությունները Կիևին տրամադրել են ևս 1,5 միլիարդ զլոտիի (մոտ 400 միլիոն դոլարի) ռազմական օգնություն։

Կոսինյակ-Կամիշը նաև հաստատել է, որ Լեհաստանը Ուկրաինային փոխանցել է Patriot հակաօդային պաշտպանության համակարգերի համար նախատեսված հրթիռներ։ Նա նշել է, որ այդ որոշումն ընդունվել է ՆԱՏՕ-ի գլխավոր քարտուղարի առաջարկով, Եվրոպայում ԱՄՆ զինված ուժերի հրամանատարության խնդրանքով և Patriot համակարգեր շահագործող երկրների հետ անցկացված խորհրդակցություններից հետո։

Նախարարի խոսքով՝ Ուկրաինային փոխանցված հրթիռների քանակը չի գերազանցում Լեհաստանի հնարավորությունները և չի ազդում երկրի հակաօդային պաշտպանության կարողությունների վրա։

ՏԱՍՍ-ը հիշեցնում է, որ ավելի վաղ Լեհաստանի պաշտպանության նախարարը որոշել էր գաղտնազերծել Ուկրաինային տրամադրված ռազմական օգնության վերաբերյալ տվյալները այն բանից հետո, երբ ընդդիմության մի շարք ներկայացուցիչներ և նախագահ Կարոլ Նավրոցկու վարչակազմի անդամներ կառավարությանը մեղադրել էին Կիևին Patriot համակարգերի հրթիռներ փոխանցելու համար։