Աննա Հակոբյանը մեկնել է Նյու Յորք՝ մասնակցելու Առաջին տիկնանց և առաջին պարոնների համաշխարհային ակադեմիային

ՀՀ վարչապետի տիկին, «Իմ քայլը» բարեգործական հիմնադրամի գործադիր տնօրեն Աննա Հակոբյանը հունիսի 30-ից հուլիսի 2-ը գտնվում է ԱՄՆ-ի Նյու Յորք քաղաքում։ Նա հիմնադրամի փոխտնօրեն Թալին Թօփալաքեանի ուղեկցությամբ մասնակցում է Առաջին տիկնանց և առաջին պարոնների համաշխարհային ամենամյա ակադեմիային։ Այս մասին հայտնում է «Իմ քայլը» բարեգործական հիմնադրամը։

Հաղորդագրության համաձայն՝ եռօրյա ինտենսիվ ակադեմիան անցկացվում է «Ֆորդ» հիմնադրամի Սոցիալական արդարության կենտրոնում։

Նշվում է, որ առաջիկա երկու օրերի ընթացքում նախատեսված են դասընթացներ և քննարկումներ, որոնք կկենտրոնանան առաջնորդության երեք հիմնական ուղղությունների վրա՝ առաջին տիկնանց և առաջին պարոնների առաջնորդության առանձնահատկությունները, բարդ պայմաններում ազգային նախաձեռնությունների առաջխաղացումը, ինչպես նաև տարածաշրջանային և միջազգային համագործակցության դերը գլոբալ մարտահրավերների հաղթահարման գործում։