Թրամփի կոշտ ուղերձը․ ԱՄՆ-ն նոր օդային հարվածներ է հասցրել Իրանի ռազմական օբյեկտներին

ԱՄՆ զինված ուժերը հերթական օդային հարվածներն են հասցրել Իրանի տարածքում գտնվող ռազմական օբյեկտներին: Ըստ ամերիկյան կողմի հայտարարության՝ գործողությունն իրականացվել է Թեհրանի կողմից հրադադարի համաձայնագրի դրույթները պարբերաբար խախտելու պատճառով:

Միացյալ Նահանգների կենտրոնական հրամանատարության (CENTCOM) փոխանցմամբ՝ թիրախում են հայտնվել իրանական հրթիռների ու անօդաչու թռչող սարքերի պահեստարանները, ինչպես նաև ափամերձ ռադարային կայանները: Ռազմական գերատեսչությունը հստակեցրել է, որ այս քայլը պատասխան էր Իրանի կողմից առևտրային տանկերի ուղղությամբ իրականացված վերջին հրթիռակոծությանը։

ԱՄՆ նախագահ Դոնալդ Թրամփը սոցիալական հարթակում արված հայտարարությամբ հաստատել է ավիահարվածների փաստը: Սպիտակ տան ղեկավարը նշել է, որ Վաշինգտոնը պատրաստ է դիմել ավելի կոշտ ռազմական միջոցների, եթե տարածաշրջանում հրադադարի ռեժիմի խախտումները և հարձակումները շարունակվեն: