12:00 Լուրերը մեկ տողով. Միջուկային զենքի արգելքի չեղարկում. ԵԱՏՄ-ում՝ ճգնաժամ

Անցած ժամվա լուրերը՝ հակիրճ և բովանդակային.

•Սահմանադրական դատարանում ընտրությունների արդյունքների վիճարկման նիստերը շարունակվում են: Հայկ Մարությանի ղեկավարած «Նոր ուժ» ռեֆորմիստական կուսակցությունը այլևս չի մասնակցելու նիստերին՝ իր դիմումի համաձայն։ 

•Արդարադատության նախարարությունը պարզաբանել է ընդդիմության ներկայացուցիչների նկատմամբ ընտրակաշառքի գործերով հարուցված քրեական վարույթների պատճառները։

•Գործող կառավարչի՝ ԵԱՏՄ-ի վերաբերյալ կառավարության նիստում հնչեցված հայտարարությունը և դրան ի պատասխան ՌԴ ԱԳՆ պաշտոնական մեկնաբանությունը ցույց են տալիս, որ ՀԱՊԿ-ի շուրջ ճգնաժամին հետևում է նաև ԵԱՏՄ-ի շուրջ ճգնաժամը։ Այս մասին գրել է Տիգրան Աբրահամյանը։

•Հայաստանում TRIPP ենթակառուցվածքային նախագծի և Սյունիքի երկաթուղու կառուցման հստակ արժեքը դեռևս հանրայնացված չէ։ Հիմնական ֆինանսական ներդրումներն իրականացնելու են ամերիկյան գործընկերները, իսկ հաշվարկներն այժմ քննարկման փուլում են։

•Կրթության նախարարությունն առաջարկում է սահմանել սեզոնային դպրոցների և ճամբարային ծրագրերի ներկայացման միասնական ձևաչափ։ Բարեփոխումը թույլ կտա լուծել ծրագրերի բովանդակության, սննդի ու անվտանգության միասնական գնահատման խնդիրները։


•Ֆինլանդիան պաշտոնապես չեղարկել է իր տարածք միջուկային զենքի ներկրման և տեղակայման արգելքը։ Օրենսդրական այս պատմական փոփոխությունը նպատակ ունի ուժեղացնել երկրի ու ՆԱՏՕ-ի անվտանգությունն ու միջուկային զսպման գործոնը։