Գյումրիի ոստիկաններից մեկը մեղադրվում է քաղաքացիներին խոշտանգելու համար

ՀՀ քննչական կոմիտեն հայտնում է, որ ավարտվել է նախաքննությունը Գյումրիում ծառայություն իրականացրած ոստիկան Ս.Խ.-ի վերաբերյալ քրեական վարույթով։

Ըստ ՔԿ-ի՝ ոստիկանության ծառայողը, տեղեկանալով, որ մի քաղաքացի սպառնացել և սեռական բնույթի հայհոյանքներ է տվել հարևանուհուն, նրան տարել է ոստիկանության բաժին և այնտեղ ծեծի ենթարկել՝ բազմաթիվ հարվածներ հասցնելով մարմնի տարբեր մասերին։ Քննության տվյալներով՝ նա ֆիզիկական ուժեղ ցավ և հոգեկան տառապանք է պատճառել քաղաքացուն։

Նախաքննության ընթացքում բացահայտվել է նաև երկրորդ դեպքը, ըստ որի՝ նույն ծառայողը հայհոյանքի համար մեկ այլ քաղաքացու նույնպես տարել է ոստիկանության բաժին և խոշտանգել։

Ս.Խ.-ի նկատմամբ հարուցվել է հանրային քրեական հետապնդում՝ խոշտանգման հոդվածով՝ երկու դրվագով։ Նրա նկատմամբ որպես խափանման միջոց կիրառվել է կալանքը։

Քրեական վարույթը մեղադրական եզրակացությամբ ուղարկվել է հսկող դատախազին՝ դատարան ուղարկելու միջնորդությամբ։