Շոգի ալիքը հասնում է Եվրոպա․ մի շարք երկրներում վտանգավոր բարձր ջերմաստիճաններ են

Եվրոպայի մի շարք երկրներում առաջիկա օրերին սաստիկ շոգեր են։ 

Ըստ Euronews-ի՝ Իսպանիայում օդի ջերմաստիճանը կարող է հասնել մինչև + 45-ի, իսկ Ֆրանսիայի որոշ շրջաններում նույնպես սպասվում է շոգի զգալի ուժգնացում։

Ըստ կանխատեսումների՝ Աֆրիկայից եկող տաք օդային զանգվածները կազդեն հատկապես Իսպանիայի և Ֆրանսիայի վրա։ Իսպանիայի մեծ մասում գիշերային ջերմաստիճանը չի իջնի +25-ից, իսկ որոշ շրջաններում ցերեկը կարող է գրանցվել մինչև +45։

Reuters-ի փոխանցմամբ՝ Ֆրանսիայում ևս իշխանությունները պատրաստվում են սաստիկ շոգերին․ մի շարք շրջաններում ջերմաստիճանը կարող է մոտենալ +40-ի։ Ֆրանսիայում շոգի պատճառով որոշ քաղաքներում այգիները բաց են պահվում նաև գիշերը, որպեսզի բնակիչները կարողանան ավելի հեշտ դիմանալ բարձր ջերմաստիճանին։ Սահմանափակվել է նաև ալկոհոլի օգտագործումը հանրային միջոցառումների ժամանակ։

Շոգ է նաև Իտալիայում և Գերմանիայում։ AP-ի տվյալներով՝ Իտալիայի մի շարք քաղաքներում բարձր ջերմաստիճանի պատճառով զգուշացումներ են հայտարարվել, իսկ Գերմանիայում օդի ջերմաստիճանը կարող է մոտենալ +38-ի։ 

Մասնագետները նշում են, որ նման բարձր ջերմաստիճանները ոչ միայն առողջապահական, այլև տնտեսական ռիսկեր են ստեղծում՝ ազդելով աշխատանքի արտադրողականության, էներգիայի սպառման, տրանսպորտի և զբոսաշրջության վրա։