Գագիկ Ծառուկյանը Հիսուսի հսկայական արձանով ցանկանում է «նոր բրենդ» ստեղծել Հայաստանի համար. The Guardian

Բրիտանական հեղինակավոր The Guardian պարբերականը ծավալուն հոդված է հրապարակել հայաստանյան հայտնի գործարար,  մեծահարուստ, քաղաքական գործիչ Գագիկ Ծառուկյանի և Հատիս լեռան գագաթին կառուցվող Հիսուս Քրիստոսի մոնումենտալ արձանի մասին։

Հարցազրույցը AURORA NEWS-ը ներկայացնում է սեփական թարգմանությամբ:

Ծառուկյանը բացառիկ հարցազրույց է տվել պարբերականին իր ծննդավայր Առինջ գյուղի առանձնատանը՝ պատմելով իր հավակնոտ ծրագրերի և քաղաքական մարտահրավերների մասին:

Իր էպատաժային ճաշակով և շքեղ կյանքով հայտնի գործարարը, ում առանձնատանը շրջում են վագրեր ու առյուծներ, վստահ է, որ Հատիսի գագաթին վեր հառնող 101 մետրանոց արձանը դառնալու է «Հայաստանի այցեքարտը»։

«Մենք աշխարհի հնագույն քրիստոնյա ազգն ենք։ Լիովին տրամաբանական է, որ մենք պետք է ունենանք Հիսուսի ամենամեծ արձանը աշխարհում»,- Guardian-ի հետ զրույցում նշել է Ծառուկյանը։

Նա հավելել է, որ նախագիծը համահունչ է աշխարհում աճող այն միտմանը, որը համատեղում է կրոնական հավատքը ազգայնականությունը և մշակութային պահպանողականության հետ (ինչպես Դոնալդ Թրամփի MAGA շարժումը)։ Ծառուկյանը նույնիսկ նշել է, որ Թրամփը հրավիրված է բացմանը, և հույս ունի, որ նա կժամանի Հայաստան։ Ըստ գործարարի հաշվարկների՝ արձանը տարեկան կներգրավի մինչև 10 միլիոն զբոսաշրջիկ:

Չնայած Ծառուկյանի մեծ սպասումներին, նախագիծը միանշանակ չի ընդունվել հանրության կողմից.

Հայ Առաքելական եկեղեցին բազմիցս դեմ է արտահայտվել այս նախաձեռնությանը՝ պնդելով, որ հսկայական արձանների կառուցումը խորթ է հայկական հոգևոր և ճարտարապետական ավանդույթներին, որոնք պատմականորեն արտահայտվել են վանքերով ու խաչքարերով։

Բնապահպանները նախազգուշացնում են, որ շինարարությունը կարող է անդառնալի վնաս հասցնել Հատիս լեռան բնական լանդշաֆտին։

Ծառուկյանը, սակայն, մերժում է այս առարկությունները՝ շեշտելով, որ ինքը լավ հարաբերություններ ունի եկեղեցու հետ և արդեն իսկ ֆինանսավորել է 8 եկեղեցիների կառուցում ամբողջ երկրում։

Հոդվածում անդրադարձ է կատարվում նաև Ծառուկյանի քաղաքական ներկայիս ծանր դրությանը։ Վերջին խորհրդարանական ընտրություններում նրա «Բարգավաճ Հայաստան» կուսակցությունը հավաքել է ձայների 4%-ից պակաս՝ չհաղթահարելով անցողիկ շեմը (արդյունքը ներկայումս բողոքարկվում է դատարանում)։

Վարչապետ Նիկոլ Փաշինյանը, ով 2018-ին իշխանության է եկել օլիգարխիկ համակարգը քանդելու խոստումով, Ծառուկյանին համարում է կոռումպացված,  հին կարգերի խորհրդանիշ: Ընտրություններից անմիջապես հետո իրավապահները ժամանել են Ծառուկյանի տուն ՝ նրան հարկային հանցագործությունների մեղադրանք առաջադրելու համար։ Չնայած լուրերին, թե նա փորձել է լքել երկիրը, Ծառուկյանը Guardian-ին պարզաբանել է, որ պարզապես կարճատև ուղևորություն էր ծրագրել ԱՄԷ, սակայն իրեն թույլ չեն տվել նստել ինքնաթիռ։

Իրավական ճնշումների վերաբերյալ հարցին գործարարը պատասխանել է. «Ինչպե՞ս կարող է մարդը վախենալ։ Ինչո՞ւ վախենալ: Ինչի՞ համար են ինձ բանտ նստեցնելու»:

Լոգիստիկ բարդությունների պատճառով 2022 թվականից ընդհատումներով ընթացող շինարարությունը դեռ ավարտված չէ։ Սակայն Ծառուկյանը կանգ առնելու մտադրություն չունի։ Նա լրագրողին է ցուցադրել իր հաջորդ հսկայական նախագծի մակետը՝ Նոյյան տապանը (134 մետր երկարությամբ, 24 մետր լայնությամբ և 18 մետր բարձրությամբ), որի առաջին հարկում լինելու է թանգարան, երկրորդում՝ հյուրանոց, իսկ երրորդում՝ սրճարան։

«Այս նախագծերը սուրբ են։ Այսպես ես կգրեմ իմ անունը պատմության մեջ, որպեսզի աշխարհը տեսնի իմ կենդանության օրոք և դրանից երկար ժամանակ անց»,- եզրափակել է Գագիկ Ծառուկյանը։