Հայաստանի կառավարությունը զարգացնում է տեղահանվածների ինտեգրման ծրագրերը

Ազգային ժողովի հունիսի 16-ի նիստին այս մասին հայտարարեց ՀՀ փոխվարչապետ Տիգրան Խաչատրյանը՝ 2025 թվականի պետական բյուջեի կատարողականի ընթացքում անդրադառնալով Ղարաբաղից տեղահանված հայրենակիցներին ցուցաբերված աջակցությանը: Ըստ նրա՝ 2023 թվականի սեպտեմբերից ի վեր գործադիրի կողմից կյանքի կոչված ծրագրերը հնարավորություն են տվել ոչ միայն արդյունավետ կերպով կառավարել ճգնաժամը, այլև հուսալի նախադրյալներ են ստեղծել հրատապ օգնությունից սոցիալ-տնտեսական ինտեգրման անցումն ապահովելու համար: 

«Եթե 2023-2024 թվականներին բյուջետային ծրագրերով ֆինանսավորվող աջակցության ձևաչափերում Կառավարության առաջնահերթությունը տեղահանվածների կեցության ծախսերի, այդ թվում՝ վարձավճարների փոխհատուցումն էր, ապա 2025-ին առաջնային է համարվել բնակարանային լուծումների, ինչպես նաև սեփական աշխատանքով արժանապատիվ բարեկեցությունը ամրացնող ծրագրերի իրականացումը»,- նշեց փոխվարչապետը: Խաչատրյանը հայտնեց նաև, որ 2026 թվականի մայիսի 31-ի դրությամբ բնակարանի ձեռքբերման ծրագրով հավաստագիր է հատկացվել 6444 ընտանիքի, որոնցում ներառված է 26 հազար 432 մարդ: «Ընտանիքներից ավելի քան 2970-ը կամ 13400 մարդ արդեն իսկ գնել է իր տունը կամ բնակարանը: Կառավարության աջակցության շրջանակներում տեղահանված մեր հայրենակիցների գնած բնակարանների արժեքը կազմում է շուրջ 48 միլիարդ դրամ»,- տեղեկացրեց նա: Փոխվարչապետը հավելեց, որ 2025 թվականի տարեվերջին Կառավարությունը հաստատել է նաև Ղարաբաղից տեղահանված առանձին խմբերի համար վարձավճարի մասնակի հատուցման միջոցառումը, շարունակվել են դրամական օժանդակության ծրագրերը: 

«Ընդհանուր առմամբ 2025-ին վերոնշյալ աջակցության ծրագրերի ուղղությամբ ծախսվել է շուրջ 38 մլրդ դրամ, իսկ 2026-ի պետբյուջեով նույն ծրագրային ուղղություններով հատկացումների գումարը 55 մլրդ է»,- հայտնեց նա՝ շեշտելով, որ 2025 թվականի դեկտեմբերի 31-ի դրությամբ Հայաստանում ավելի քան 31 հազար 300 տեղահանված հայրենակիցներ ունեն մշտական աշխատանք կամ ինքնազբաղվածություն: «Ընդհանուր առմամբ, Ղարաբաղից տեղահանված մեր հայրենակիցներին աջակցության ծրագրերի իրականացման նպատակով 2025-ին պետբյուջեից փաստացի ծախսվել է 45 մլրդ 700 մլն դրամ, իսկ 2023-ից ի վեր՝ շուրջ 146 մլրդ դրամ»,- եզրափակեց փոխվարչապետը: