Աշխատանքային օրենսգրքում «ծնողական ժամ» սահմանող փոփոխություններ են նախատեսվում

Աշխատանքի և սոցիալական հարցերի նախարարի տեղակալ Լուսինե Քոչարյանն առաջին ընթերցմամբ քննարկման է ներկայացրել ՀՀ աշխատանքային օրենսգրքում փոփոխություն և լրացում նախատեսող օրենքի նախագիծը, որը մշակվել է աշխատանքային հարաբերություններում սոցիալապես պաշտպանված կարգավորումներ ունենալու անհրաժեշտությունից ելնելով։

Փոխնախարարի պարզաբանմամբ՝ նախատեսվող փոփոխությունը վերաբերում է «ծնողական ժամ» հոդվածի սահմանմանը, ինչը հնարավորություն կտա ծնողին վարձատրությամբ բացակայել աշխատանքից։ «Կես ժամ կարող են բացակայել այն ծնողները, որոնք ունեն մինչև տասներկու տարեկան մեկ և երկու երեխա, 1 ժամ կարող են բացակայել այն ծնողներ, որոնք ունեն երեք և ավելի երեխաներ»,- նշել է զեկուցողը։ Լուսինե Քոչարյանը հավելել է նաև, որ հաշմանդամություն ունեցող մինչև 18 տարեկան երեխաների ծնողները, անկախ երեխաների քանակից, կարող են աշխատանքից բացակայել մեկ ժամ և վճարվել իրենց միջին հիմնական աշխատավարձի չափով։

Գլխադասային՝ Աշխատանքի և սոցիալական հարցերի մշտական հանձնաժողովի դրական եզրակացությունը ներկայացրել է հանձնաժողովի անդամ Մարիամ Պողոսյանը։ Նրա փոխանցմամբ՝ «ծնողական ժամից» օգտվելու իրավունք ունեն երեխայի թե՛ մայրը, թե՛ հայրը։