Գյումրիի «Մայր Հայաստան» հուշահամալիրի տառերը պոկած տղամարդը ձերբակալվել է

Գյումրի քաղաքի «Մայր Հայաստան» հուշահամալիրի «Հերոս քաղաքների» հուշարձանների ոսկեգույն տառերը պոկելու և վնասելու դեպքով 41-ամյա տղամարդ է ձերբակալվել, հայտնում են իրավապահները։

Հունիսի 11-ին Ղարսի խճուղիում գտնվող հուշահամալիրում տեղի ունեցած միջադեպի առթիվ Համայնքային ոստիկանության Մուշի բաժնում կազմված նյութերը փոխանցվել էին Շիրակի մարզային քննչական վարչություն, որտեղ նախաձեռնվել էր քրեական վարույթ՝ ՀՀ քրեական օրենսգրքի 301-րդ հոդվածի 1-ին մասի հատկանիշներով։

Քրեական ոստիկանության գլխավոր և Շիրակի մարզային վարչությունների, ինչպես նաև Համայնքային ոստիկանության Մուշի ու Կումայրիի բաժինների ծառայողների իրականացրած օպերատիվ-հետախուզական ծավալուն ու համակարգված միջոցառումների արդյունքում հունիսի 14-ին հավաստի տվյալներ են ստացվել այն մասին, որ հունիսի 9-ին՝ ժամը 15։00-ի սահմաններում, հուշարձանների տառերը պոկել է Գյումրիի Մուշ 2 թաղամասի բնակիչ հանդիսացող 41-ամյա մի տղամարդ։

Նույն օրը՝ ժամը 08։40-ին, հիշյալ անձը հայտնաբերվել, ձերբակալվել և տեղափոխվել է ՔՈԳՎ Շիրակի մարզային վարչություն, որտեղ խոստովանել է իր կատարած արարքը։ 41-ամյա տղամարդն ու կազմված փաստաթղթերը ներկայացվել են Շիրակի մարզային քննչական վարչություն։ Նախաքննությունը շարունակվում է։