ՏԵՍԱՆՅՈՒԹ. Որքան կփոխհատուցվի արտահանում իրականացնող տնտեսվարողը

Էկոնոմիկայի նախարարի տեղակալ Արման Խոջոյանը կառավարության նիստում ներկայացրել է նախագիծ, որով առաջարկվում է հաստատել ծիրանի, սալորի, կեռասի, հանքային ջրի, գինու և բրենդիի արտահանման սուբսիդավորումը։ Նախագծով առաջարկվում է հունիսի ընթացքում արտահանում իրականացնող տնտեսավարողներին տրամադրել փոխհատուցում հետևյալ չափերով՝

• Ծիրան (1 կգ) - 200 դրամ
• Սալոր, դեղձ, նեկտարին (1 կգ) - 250 դրամ
• Կեռաս (1 կգ) - 400 դրամ
• Շշալցված խաղողի գինի (1 լ) - 350 դրամ
• Հանքային ջուր (1 լ) - 150 դրամ

Նրա խոսքով՝ նշված ապրանքների արտահանումը հունիսի ընթացքում իրականացնելուց հետո փոխհատուցում ստանալու նպատակով տնտեսավարող սուբյեկտը դիմում է Էկոնոմիկայի նախարարություն և ներկայացնում երկու փաստաթուղթ. Եվրասիական տնտեսական միության անդամ պետություններ արտահանման նպատակով լրացված տարանցման հայտարարագրի կամ «Արտահանում» մաքսային ընթացակարգով ձևակերպված հայտարարագրի պատճենները, ինչպես նաև հաշվարկային փաստաթուղթը՝ հաշիվ-ապրանքագիրը։

«Այս որոշման նախագծի ընդունումը հնարավորություն կտա դիվերսիֆիկացնել արտահանման շուկաները և կնպաստի կազմակերպությունների բնականոն գործունեության ապահովմանը», - ասել է նա։