1 ձայնը որոշիչ է, սրանով է պայմանավորված, որ բոլորի նյարդերը լարված են. ԿԸՀ նախագահ

ԿԸՀ նախագահ Վահագն Հովակիմյանը հայտարարել է, որ խորհրդարանական ընտրությունների նախնական արդյունքների ամփոփման ժամանակ արձանագրվել է ընդամենը 5 կամ 6 տեխնիկական սխալ, և հունիսի 14-ին հրապարակվելիք վերջնական տվյալները լինելու են լիովին ճշգրիտ:

Ազգային ժողովում 2025 թվականի պետական բյուջեի տարեկան հաշվետվության քննարկման ընթացքում Վահագն Հովակիմյանն անդրադարձել է «Քաղաքացիական պայմանագիր» խմբակցության պատգամավոր Ալխաս Ղազարյանի հարցին, թե արդյոք հունիսի 14-ի արդյունքներով վերջնականապես ամփոփվելու են հունիսի 7-ին կայացած խորհրդարանական ընտրությունների արդյունքները։ 

ԿԸՀ նախագահը նշել է, որ նախկինում սխալ մուտքագրումները շատ ավելի մեծ թիվ են կազմել, սակայն ներկայումս ստեղծվել է մի իրավիճակ, երբ նույնիսկ մեկ ձայնը կարող է որոշիչ լինել, ինչով էլ պայմանավորված է բոլորի նյարդային լարվածությունը։ Այս համատեքստում նա ընդգծել է, որ արձանագրված տեխնիկական բնույթի սխալները սահմանափակվել են ընդամենը 5-6 դեպքով, իսկ այլ բացթողումներ չեն եղել։ 

Հովակիմյանի փաստմամբ՝ հենց նման ճշգրտումների անհրաժեշտության պատճառով է առաջին փուլը կոչվում «նախնական արդյունքներ», քանի որ դրանից հետո միայն մեկնարկում է տվյալների ստուգման գործընթացը, և հավելել է, որ հանձնաժողովից ավելի շահագրգիռ կողմ չկա՝ ձայների բացարձակ ճշգրտությունն ապահովելու հարցում։