Մենք ենք որոշելու՝ երբ դուրս գանք ՀԱՊԿ–ից, ոչ թե օտարերկրյա գործակալները. Փաշինյան

Եթե անհրաժեշտ լինի՝ դուրս կգանք։ Ես ասել եմ, որ հետ չենք վերադառնալու, և մենք ենք որոշելու՝ երբ դուրս գանք, ոչ թե օտարերկրյա գործակալները: Այս մասին Հանրային հեռուստատեսությամբ հեռարձակված նախընտրական բանավեճի ընթացքում հայտարարել է ՀՀ վարչապետ Նիկոլ Փաշինյանը՝ անդրադառնալով ՀԱՊԿ–ում մասնակցության «սառեցման» մասին հարցին:

Բանավեճի ընթացքում «Ուժեղ Հայաստան» կուսակցության վարչության անդամ և կուսակցության ղեկավարի եղբորորդի Նարեկ Կարապետյանը Փաշինյանից հետաքրքրվել է, թե ինչ է նշանակում ՀԱՊԿ-ում մասնակցության «սառեցումը», և ինչու մինչ այժմ որոշում չի կայացվել կազմակերպությունից դուրս գալու վերաբերյալ։

«Դուրս կգանք։ Մեզ ի՞նչ է, վախեցնո՞ւմ եք։ Որոշում կկայացնենք և դուրս կգանք, որոշում կկայացնենք և դուրս կգանք։ Եթե անհրաժեշտ լինի՝ դուրս կգանք։ Ես ասել եմ, որ հետ չենք վերադառնալու, և մենք ենք որոշելու՝ երբ դուրս գանք, ոչ թե օտարերկրյա գործակալները»,– ասել է նա։

2024 թվականի սեպտեմբերին Փաշինյանը հայտարարել էր, որ Երևանը սառեցրել է իր մասնակցությունը ՀԱՊԿ աշխատանքներին՝ պնդելով, որ կազմակերպությունը սպառնալիքներ է ստեղծել հանրապետության ինքնիշխանության համար։

2024 թվականի հոկտեմբերին ՀՀ արտգործնախարար Արարատ Միրզոյանը Վարշավայում կայացած անվտանգության հարցերին նվիրված միջազգային համաժողովում հայտարարել էր, որ Երևանը հաշվարկում է ՀԱՊԿ-ից դուրս գալու որոշման հետ կապված բոլոր ռիսկերը։