Հրազդանում ԱԲ մեգակենտրոնի կառուցումը մոտենում է եզրափակիչ փուլին

ԲՏԱ նախարար Մխիթար Հայրապետյանը Ֆեյսբուքի իր էջում հայտնել է, որ Հրազդանում արհեստական բանականության (ԱԲ) մեգակենտրոնի կառուցման աշխատանքները մոտենում են ավարտին։

ԲՏԱ նախարար Մխիթար Հայրապետյանը Firebird AI ընկերության համահիմնադիր Ալեքսանդր Եսայանի հետ համատեղ տեղում ծանոթացել է պաշտոնական գործարկման նախապատրաստական գործընթացներին և ենթակառուցվածքների պատրաստվածությանը։ Նախարարի ձևակերպմամբ՝ տվյալ նախագիծը հանդիսանում է ոչ միայն հզոր ինժեներական կառույց, այլև Հայաստանի ապագայի տեխնոլոգիական տնտեսության կարևորագույն հիմնաքարը, քանի որ ռազմավարական նպատակն է երկիրը վերածել գլոբալ «ԱԲ գործարանների պարտեզի», որտեղ գերհզոր հաշվարկային հնարավորությունները, տեղական տաղանդն ու նորարարական էկոհամակարգը կաշխատեն փոխլրացմամբ։ 

Ծրագրի առաջին փուլի ներդրումների ծավալը կազմում է 500 մլն ԱՄՆ դոլար, իսկ երկրորդ փուլի ավարտին ընդհանուր ներդրումները կհասնեն շուրջ 4 մլրդ ԱՄՆ դոլարի։ Այս մեգանախագիծը կդառնա տարածաշրջանի խոշորագույնը, և գործարկումից հետո 200.000 քառակուսի մետր տարածքում կաշխատի ավելի քան 6000 NVIDIA Blackwell GPU։

Մինչև 2027 թվականի ավարտը GPU-ների թիվը կգերազանցի 100.000-ը (NVIDIA Blackwell և Vera Rubin)` Հայաստանը դասելով արհեստական բանականության հաշվարկային հզորությամբ աշխարհի առաջատար հինգ երկրների շարքում։ 

«ՀՀ Կառավարության և Firebird ընկերության համատեղ համագործակցության շնորհիվ Հայաստանը տեխնոլոգիաների սպառողից վերածվում է աշխարհին արհեստական բանականության բարձր տեխնոլոգիական արդյունք և լուծումներ առաջարկող երկրի, որը պատրաստ է սահմանել ապագայի խաղի կանոնները»,- գրել է նա։