Հայաստանցիները շարունակում են աշխատանքի մեկնել Ռուսաստան

Ավելի քան 42 հազար ՀՀ քաղաքացի երեք ամսվա ընթացքում աշխատանքի նպատակով մեկնել է Ռուսաստան։ ՏԱՍՍ-ի հաղորդմամբ՝ այս մասին վկայում են վիճակագրական տվյալները:Հունվար-մարտ ամիսներին Ռուսաստան աշխատանքի նպատակով մուտք է գործել Հայաստանի 42 366 քաղաքացի, մինչդեռ 2025 թվականի նույն ժամանակահատվածում այդ ցուցանիշը կազմել էր 45 526։

Ընդհանուր առմամբ, 2026 թվականին Ռուսաստան է ժամանել Հայաստանի 112 741 քաղաքացի (2025 թվականին՝ 125 143)։ Նրանցից 50 699-ը նշել են մասնավոր այցը որպես այցի նպատակ, շուրջ 3,2 հազարը՝ ուսումը, 1 568-ը՝ զբոսաշրջությունը, 1 308-ը՝ գործնական այցը, 12 289-ը մուտք են գործել որպես սպասարկող անձնակազմ, իսկ 1 311-ը երկիրն անցել են տարանցիկ։

ՀՀ քաղաքացիների մեծ մասը Ռուսաստան է մեկնել օդային (69 761) և ավտոմոբիլային (39 857) ճանապարհով։ Ոտքով սահմանը հատել է 3 054 մարդ, իսկ երկաթուղային տրանսպորտից օգտվել է 68 քաղաքացի։

Վերջին շրջանում Երևանը հայտարարում է Եվրամիության հետ ինտեգրման քաղաքականության մասին։ ՌԴ նախագահ Վլադիմիր Պուտինն ավելի վաղ նշել էր, որ ԵՄ-ին ինտեգրումը ինքնաբերաբար կհանգեցնի Հայաստանի և ԵԱՏՄ-ի միջև համագործակցության դադարեցմանը և այն արտոնությունների կորստին, որոնցից Երևանը օգտվել է ԵԱՏՄ անդամակցության ընթացքում։

Միևնույն ժամանակ, ՀՀ վարչապետ Նիկոլ Փաշինյանը հայտարարել է, որ Հայաստանը չի պատրաստվում դուրս գալ ԵԱՏՄ-ից և ձգտում է հնարավորինս երկար համատեղել կազմակերպության անդամակցությունն ու ԵՄ-ի հետ ինտեգրման գործընթացը։