Վարչապետ Փաշինյանի հետ վիճաբանած, կալանավորված Արթուր Օսիպյանի փաստաբանը հայտարարություն է արել.
 
 «Որպես կալանավորված քաղաքացի Արթուր Օսիպյանի փաստաբան՝ ձեզ եմ փոխանցում իմ պաշտպանյալի բաց դիմում-նամակները՝ ուղղված ՀՀ Մարդու իրավունքների պաշտպանին և ՀՀ-ում գործող միջազգային դիվանագիտական առաքելություններին։ Խնդրում եմ անհապաղ հանրայնացնել այս տեղեկատվությունը, քանի որ իմ պաշտպանյալի կյանքին և առողջությանն անմիջական վտանգ է սպառնում։ Խոսքի ազատության և քաղաքացիական դիրքորոշման համար կալանավորված Ա. Օսիպյանը բոլորում է հացադուլի 15-րդ օրը՝ ի նշան բողոքի իր նկատմամբ իրականացվող քաղաքական հալածանքների:

Մայիսի 18-ին բերման ենթարկվելիս ՀՀ վարչապետը հրապարակավ և ուղիղ տեքստով սպառնացել է նրան։ Գտնվելով պետական վերահսկողության տակ գտնվող հիմնարկում՝ Օսիպյանը հիմնավոր վախեր ունի, որ իրեն կարող են թունավորել կամ ֆիզիկական հաշվեհարդար տեսնել։

Իշխանության աջակիցների կողմից նրա նկատմամբ կիրառված բռնության, ինչպես նաև հեռախոսն առգրավելու և ֆեյսբուքյան էջն ապօրինի ջնջելու փաստերով որևէ քրեական վարույթ չի նախաձեռնվել:

Ա. Օսիպյանը կտրականապես հերքում է օտարերկրյա գործակալ լինելու մասին լուրերը։ ԼՂ-ում ռուսական զորքերի ապօրինությունների դեմ իր պայքարի պատճառով նա ՌԴ-ում պաշտոնապես հայտարարված է «պերսոնա նոն գրատա» (անցանկալի անձ):

Կից տեղադրում եմ նամակների հայերեն և անգլերեն բնօրինակները. խնդրում եմ հրապարակել համապատասխան տարբերակներն ամբողջությամբ։

Ակնկալում եմ ձեր հրատապ լուսաբանումը։

Հարգանքով՝
Արթուր Օսիպյանի փաստաբան
Դավիթ Հովհաննիսյան»: