ԿԳՄՍՆ-ն արձագանքել է դպրոցների փակման մասին տեղեկություններին

Որոշ քաղաքական ուժեր ընտրություններին ընդառաջ շարունակում են սուտ տեղեկություններ տարածել, թե 2026 թվականի սեպտեմբերից Հայաստանում նախատեսվում է փակել 229 դպրոց, ինչի մասին հայտնում են ԿԳՄՍՆ-ից։

Նախարարությունից ևս մեկ անգամ հայտնում են, որ նշված պնդումները ապատեղեկատվություն են և չեն համապատասխանում իրականությանը։ Կրթության բնագավառում պետական քաղաքականության նպատակն է մեծացնել կրթության հասանելիությունը և բարձրացնել որակը, ինչի հստակ ապացույցն են հանրապետության ողջ տարածքում իրականացվող նախադպրոցական հաստատությունների ու դպրոցների կառուցման և վերակառուցման մեծածավալ ծրագրերը։

Կառույցից նշում են, որ ցավալի է կրթական ոլորտի շահարկումը՝ հանրության շրջանում անհիմն անհանգստություն ստեղծելու համար։ Նախարարությունը կոչ է անում հիմնվել միայն հավաստի ու պաշտոնական աղբյուրների վրա և հավելում, որ շարունակելու է հասարակությանը ճշգրիտ ու լիարժեք տեղեկություններ փոխանցել կրթության ոլորտում կատարվող ծրագրերի մասին։

ԿԳՄՍՆ