Հանտավիրուսը տարածվում է․ ԱՄՆ-ում մահվան դեպք է արձանագրվել

ԱՄՆ Կոլորադո նահանգի հանրային առողջապահության և շրջակա միջավայրի դեպարտամենտը (CDPHE) պաշտոնապես հաստատել է հանտավիրուսային վարակի հետևանքով արձանագրված մահվան դեպք:

Դուգլաս շրջանի բնակիչը մահացել է հիվանդության բարդություններից։ Առողջապահության նախարարության փորձագետների փոխանցմամբ՝ Sin Nombre տեսակի հանտավիրուսը Կոլորադոյում նորություն չէ և նահանգի տարածքում ի հայտ է գալիս պարբերաբար՝ հատկապես գարնանային ու ամառային ամիսներին: Վարակի հիմնական աղբյուրը տեղական եղնիկանման մկներն են (deer mice): Այս հիվանդությունը հիմնականում ախտահարում է շնչառական համակարգը՝ առաջացնելով ծանր ախտանիշներ, որոնք հաճախ կարող են կյանքի հետ անհամատեղելի լինել:

Կոլորադոյի առողջապահական գերատեսչության ներկայացուցիչները շտապել են հանգստացնել հանրությանը՝ նշելով, որ այս դեպքը որևէ կապ չունի վերջերս MV Hondius զբոսանավում արձանագրված հանտավիրուսի բռնկման հետ: Հաշվի առնելով վարակի տեղային բնույթը՝ պատկան մարմինները բնակչությանը կոչ են անում խստորեն հետևել հիգիենայի և անվտանգության կանոններին։ Մասնավորապես, խորհուրդ է տրվում խուսափել անմիջական շփումից կրծողների և նրանց կենսագործունեության հետքերի հետ, այդ թվում՝ միզանյութի և կղանքի, թքի, բների և բնադրման համար օգտագործված նյութերի հետ։

Ներկայումս դեպարտամենտն ակտիվորեն աշխատում է վարակի բուն աղբյուրն ու օջախը հստակեցնելու ուղղությամբ։ Նախնական վարկածով՝ հիվանդությունը տարածվել է տեղական կրծողների հետ շփման արդյունքում: Այնուամենայնիվ, համաճարակաբանները վստահեցնում են, որ լայն հանրության համար վարակվելու ռիսկերը շարունակում են մնալ ցածր մակարդակի վրա։