Վոլոդինի աղմկահարույց հայտարարությունը՝ Հայաստանի մասին

Արևմտյան լիբերալ արժեքների սերմանումը և եկեղեցու նկատմամբ հալածանքները հանգեցնում են հայ հասարակության պառակտման և միասնության կորստի։ Այս մասին հայտարարել է Պետդումայի նախագահ Վյաչեսլավ Վոլոդինը, փոխանցում է «Ռիա Նովոստի»-ն։

«Արդեն տեսնում ենք պատմությունը վերաշարադրելու, ազգային ու ավանդական հիմքերը խարխլելու փորձեր։ Հայ ժողովրդին արևմտյան ազատական արժեքներ են սերմանում, հալածանք է ընթանում եկեղեցու դեմ։ Այս ամենը հանգեցնում է հասարակության պառակտման։ Եվ, թերևս, սա ամենամեծ կորուստն է, որ հնարավոր է Հայաստանում ՝ միասնության կորուստ»,-գրել է Վոլոդինը «Макс» հարթակի իր ալիքում։

Պետդումայի նախագահը, պատմական զուգահեռներ անցկացնելով, հիշատակել է 2014 թվականին Ուկրաինայում տեղի ունեցած իրադարձությունները և Մերձբալթյան երկրների օրինակը, որոնք ձգտում էին դառնալ Եվրամիության մաս, սակայն, «ինչպես ցույց է տվել ժամանակը, դրանից ավելի երջանիկ չեն դարձել»:

Նա ընդգծել է որ ճանապարհի ընտրությունը պետք է նախևառաջ հիմնված լինի ժողովրդի կամքի վրա։ Նրա կարծիքով՝ քաղաքական գործիչը ինչ պաշտոն էլ զբաղեցնի, դրանով պետք է առաջնորդվի: