Արտակարգ իրավիճակ․ ինքնաթիռը ստիպված ետ է վերադարձել Մոսկվա

Մոսկվայի մարզի «Ժուկովսկի» օդանավակայանից դեպի Վրաստան ուղևորվող օդանավը հարկադրված վերադարձել է մեկնման կետ: Միջադեպը տեղի է ունեցել թռիչքի ընթացքում, երբ  ջուրը սկսել է լցվել օդանավի պոչամասի սպասարկման սենյակներ: Պարզվել է, որ ուղևորներից մեկը  կոտրել է ջրամատակարարման ծորակը:

Ինքնաթիռի անձնակազմը, հայտնաբերելով արտահոսքը, անմիջապես դադարեցրել է ջրի մատակարարումը և կատարվածի մասին զեկուցել օդանավի հրամանատարին: Անվտանգության նկատառումներից ելնելով՝ որոշում է կայացվել ընդհատել թռիչքը և վերադառնալ օդանավակայան: Օդ բարձրանալուց մոտ երկու ժամ անց լայները բարեհաջող վայրէջք է կատարել «Ժուկովսկիում»:

Տեխնիկական զննման արդյունքում մասնագետները հաստատել են անսարքությունը, փոխարինել վնասված դետալը և համապատասխան ակտ կազմել: Ավիաընկերությունը Բաթումի մեկնող ուղևորների համար պահուստային չվերթ է կազմակերպել: Արդյունքում ճանապարհորդները Վրաստան են հասել նախատեսված ժամանակացույցից շուրջ չորս ժամ ուշացումով: