Ֆիցոն աջակցում է Ալիևին. Եվրոպայում նոր պառակտում է հասունանում

Ադրբեջանը մտադիր չէ կրճատել ռազմական ծախսերը և շարունակում է նոր գործընկերներ փնտրել Եվրոպայում։ Ադրբեջանի պաշտպանության նախարար Զաքիր Հասանովը Սլովակիայի փոխվարչապետ և պաշտպանական գերատեսչության ղեկավար Ռոբերտ Կալինյակի հրավերով պաշտոնական այց է կատարել Բրատիսլավա։ Բանակցությունների ընթացքում կողմերը քննարկել են երկու երկրների միջև ռազմական փոխգործակցության ներկա վիճակն ու զարգացման հեռանկարները։ Հատուկ ուշադրություն է դարձվել ռազմատեխնիկական ոլորտում համագործակցության հնարավորություններին և փոխադարձ այցերի հաճախակիացման կարևորությանը, գրում է  Minval Politika-ն։

Սլովակիան ունի զարգացած ռազմարդյունաբերական համալիր, ինչը լրացուցիչ հետաքրքրություն է ներկայացնում Բաքվի համար՝ զինված ուժերի շարունակական արդիականացման համատեքստում։ Թեև կողմերը չեն հստակեցրել գործարքների մանրամասները, դիտարկվում են ինչպես պատրաստի սպառազինության մատակարարման, այնպես էլ համատեղ արտադրության կազմակերպման հնարավորությունները։

Այցը տեղի է ունենում երկու երկրների միջև քաղաքական ջերմ հարաբերությունների ֆոնին։ Վերջերս Սլովակիայի վարչապետ Ռոբերտ Ֆիցոն բարձր էր գնահատել Ադրբեջանի ինքնիշխան արտաքին քաղաքականությունը և համակարծիք էր նախագահ Իլհամ Ալիևի հետ՝ Եվրոպական խորհրդարանի կողմից իրականացվող քաղաքականության վերաբերյալ։ Բրատիսլավան և Բաքուն փաստացի ձևավորում են ընդհանուր մոտեցումներ՝ հանդես գալով եվրոպական կառույցների միջամտողական քաղաքականության դեմ։