Իսրայելի ՊՆ նախարարը սպառնացել է Իրանին

Իսրայելի ռազմական գերատեսչության ղեկավար Իսրայել Կացը հայտարարել է մոտ ապագայում Իրանի դեմ ռազմական գործողություններին վերադառնալու հնարավորության մասին։

Իսրայելական լրատվամիջոցներին հղումով Report-ը հայտնում է, որ նախարարն այս մասին խոսել է Իսրայելի պաշտպանության բանակի ռազմաօդային ուժերի ապագա հրամանատար Օմեր Տիշլերին գեներալ-մայորի կոչում շնորհելու հանդիսավոր արարողության ընթացքում։ Կացի պնդմամբ՝ վերջին մեկ տարվա հարվածները Իրանին բոլոր բնագավառներում տարիներով հետ են մղել։

Գերատեսչության ղեկավարը նաև փաստել է, որ ԱՄՆ նախագահ Դոնալդ Թրամփը, համագործակցելով Իսրայելի վարչապետ Բենիամին Նեթանյահուի հետ, առաջնորդում է արշավի նպատակներին հասնելու գործընթացը։ «Մենք սատարում ենք այդ ջանքերը և տրամադրում անհրաժեշտ աջակցություն, բայց հնարավոր է, որ շուտով ստիպված լինենք վերադառնալ գործողություններին՝ առաջադրված խնդիրների իրականացումը երաշխավորելու համար», - շեշտել է Իսրայել Կացը։