Ուկրաինական ԱԹՍ-ները կրկին հարվածել են Տուապսեի նավթավերամշակման գործարանին

Ապրիլի 28-ի գիշերը ուկրաինական անօդաչուների հարձակման հետևանքով Տուապսեի նավթավերամշակման գործարանի տարածքում հրդեհ է բռնկվել։

Կրասնոդարի երկրամասի օպերատիվ շտաբի տեղեկություններով՝ ձեռնարկության վրա ընկել են ԱԹՍ-ների բեկորներ, ինչից հետո սկսվել է հրդեհը, սակայն տուժածներ չկան։ Կրակի մարմանը մասնակցել է 122 հոգուց բաղկացած անձնակազմ և 39 միավոր տեխնիկա։ 

 
 «Ռոսնեֆտին» պատկանող այս գործարանը, որը Ռուսաստանի խոշորագույնների տասնյակում է և միակն է Սև ծովի ռուսական ափին, թիրախավորվել էր նաև ապրիլի 16-ին և 20-ին։

Նախորդ հարձակումների ժամանակ ևս հրդեհներ էին բռնկվել, ընդ որում՝ ապրիլի 20-ի հարվածի հետևանքով մեկ մարդ էր զոհվել։ Վնասվել էր նաև Տուապսեի նավահանգստի նավթային տերմինալի ենթակառուցվածքը, որը գործարանի հետ կազմում է միասնական համալիր։ 

Մասնավորապես, այրվել էր նավթամթերքի ամբարների պարկը, ինչի պատճառով Reuters-ի աղբյուրները հայտնել էին վերամշակման դադարեցման մասին։ Ապրիլի 20-ի հրդեհը մարվել էր միայն չորս օր անց։ Ամբարների վնասման պատճառով նավթը լցվել էր ծովը՝ մեկ շաբաթում տարածվելով ափի երկայնքով շուրջ 77 կմ։ Տեղական իշխանությունների փոխանցմամբ՝ հավաքվել է մոտ 4,2 հազար խորանարդ մետր աղտոտված հող և ջրամազութային խառնուրդ։