ՌԴ ԱԳՆ-ի «կոշտ» արձագանքն ուղղված Ֆրանսիային

Ֆրանսիայի և Եվրոպայի այլ երկրների գործողություններն ուղղված են ուկրաինական ճգնաժամի կարգավորմանն ուղղված ցանկացած տեղաշարժի ձախողմանը, հայտարարել է Ռուսաստանի արտաքին գործերի նախարարությունը:

«Ո՛չ Ֆրանսիան, ո՛չ ԵՄ այլ երկրները ներկայումս բանակցային գործընթացի մասնակից չեն: Ավելին՝ Փարիզի և մյուս եվրոպացիների բոլոր գործողություններն ուղղված են ԱՄՆ-ի մասնակցությամբ եռակողմ շփումների շրջանակներում ուկրաինական ճգնաժամի վերաբերյալ ցանկացած դրական տեղաշարժի ձախողմանը»,- ասված է նախարարության կայքի հրապարակված հաղորդագրության մեջ:

«Ֆրանսիայի կողմից մենք տեսնում ենք ոչ թե փոխընդունելի լուծումների որոնմանն ուղղված կառուցողական առաջարկներ, այլ զուգահեռ նախաձեռնությունների գործարկման փորձեր, որոնց արդյունքները կարելի էր փորձել վերջնագրի տեսքով պարտադրել Ռուսաստանին»,- նշել են գերատեսչությունում:

ՌԴ ԱԳՆ-ում ընդգծել են, որ նման «ոչ դիվանագիտական» մոտեցումը, որն ամբողջությամբ կտրված է «տեղում» տիրող իրական իրավիճակից, ի սկզբանե դատապարտված է ձախողման: