ԱՄՆ ռազմածովային ուժերի նախարարը հրաժարական է տվել

ԱՄՆ ռազմածովային ուժերի նախարար Ջոն Ֆելանը լքել է զբաղեցրած պաշտոնը։ Պենտագոնի մամուլի քարտուղար Շոն Պարնելը X սոցիալական հարթակում տեղեկացրել է, որ հրաժարականի որոշումն ուժի մեջ է մտել անմիջապես։

«Պաշտպանության նախարարի և պաշտպանության նախարարի տեղակալի անունից մենք երախտապարտ ենք նախարար Ֆելանին՝ Պաշտպանության նախարարությանը և Միացյալ Նահանգների ռազմածովային ուժերին մատուցած ծառայության համար։ Մենք նրան հաջողություն ենք մաղթում հետագա ձեռնարկումներում», -գրել է նա։

Նախարարի պաշտոնակատարի պարտականությունները կստանձնի Հունգ Կաոն, ով նախկինում զբաղեցնում էր Ֆելանի տեղակալի պաշտոնը։

CNN-ը հայտնել է, որ Ջոն Ֆելանը նախկինում եղել է գործարար և չի ունեցել զինվորական ծառայության փորձ։ Նա ռազմածովային ուժերի նախարար էր նշանակվել 2025 թվականին՝ Դոնալդ Թրամփի նախագահ ընտրվելուց հետո։ Հեռուստաալիքը նշում է նաև, որ մինչ նշանակումը Ֆելանը կնոջ հետ մասնակցել է Թրամփի նախընտրական արշավի միջոցների հայթայթմանը։

Ապրիլի 13-ին, Թրամփի հանձնարարականով, ամերիկյան զինվորականները սկսել են Հորմուզի նեղուցի շրջափակումը, որը տարածվում է իրանական նավահանգիստներ մտնող և դուրս եկող նավերի վրա։