Փաշինյանը հայտարարությամբ է հանդես եկել

«Քաղաքացիական պայմանագիր» կուսակցության նախընտրական ծրագրի ներկայացման ժամանակ վարչապետ Նիկոլ Փաշինյանը հայտարարել է նոր էլեկտրական ավտոբուսների ու տրոլեյբուսների ձեռքբերման և տրանսպորտային ենթակառուցվածքների կառուցման ծրագրերի մասին:

Նախատեսվում է ձեռք բերել 200 հատ 18 մետրանոց նոր էլեկտրական ավտոբուսներ և 71 նոր տրոլեյբուսներ, ինչպես նաև կառուցել տրանսպորտային 6 նոր ենթակառուցվածքներ՝ կամուրջներ ու էստակադներ, որոնց կարիքը Երևանն ակնհայտորեն ունի: Այս մասին տեղեկացրել է վարչապետ Նիկոլ Փաշինյանը՝ ներկայացնելով «Քաղաքացիական պայմանագիր» կուսակցության նախընտրական ծրագիրը:

Անդրադառնալով տրոլեյբուսներին՝ վարչապետը նշել է, որ նշված թիվը չի ներառում այն տրոլեյբուսները, որոնք պետք է ժամանեին ապրիլին, սակայն Իրանի շուրջ ստեղծված իրավիճակի պատճառով մի փոքր ուշացել են: Նա հավելել է, որ նախորդ օրվա տեղեկություններով՝ դրանք արդեն շատ մոտ են Հայաստանին, և առաջիկայում դրանց մի մասն առնվազն կլինի հանրապետությունում:

Ծրագրով նախատեսվում է նաև Հայաստանի ողջ տարածքում ներդնել միասնական տրանսպորտային ցանց, ինչը ենթադրում է հանրային տրանսպորտի առկայություն բոլոր մարզերում:

«Մեր մարզերի ցավոտ խնդիրներից մեկն այն է, որ բազմաթիվ բնակավայրեր կանոնավոր ուղևորափոխադրման համակարգեր չունեն, և մենք այս տրանսպորտային ցանցերի ներդրման միջոցով պետք է խնդիրը լուծենք: Հիմա որոշ տեղերում ինչ-որ չափով ներդրված է, բայց մենք այս պրոցեսը պետք է շարունակենք, որպեսզի բոլոր բնակավայրերն ունենան կանոնավոր տրանսպորտային չվացուցակներ մարզկենտրոնի հետ, նաև, բնականաբար, Երևանի հետ»,- ասել է Նիկոլ Փաշինյանը: